ضربت جنات كف بكف، مدهوشة وغمغمت : يابت! مش هتبطلي الكسوف الزياده ده ؟! على رأي المثل اللي اختشوا يا حبيبتي!
لكزتها عليا في كتفها برقة، وهمسة: بس يا جنات… وسيبيني ف همي وغلبي وخيبتي اللي مش على حد.
اقتربت عايدة، وجلست إلى جانبها، وقالت بنبرة أم مشفقة:هم وغلب إيه يا بت؟! كفا الله الشر… عز كويس، عاملتي إيه في الواد؟
ضحكت جنات، بينما غمغمت عليا بنبرة مازحة متعبة:
سايق عليكي النبي يا مرات عمي… سبيني ف حالي، أنا مش ناقصة نئوزة.
جلست بطة على الأريكة، وهتفت بحماسة: نئوزة ليه يا بت؟! هو إحنا عايزين من الدنيا غير إن كل واحدة فيكم تعيش متهنية مع جوزها؟ هو إحنا ناقصين قلبة دماغ؟
حركت جنات شفاها بطريقة شعبية، وأطلقت تنهيدة طويلة وهي تقول: والنبي اسكتي… يا ما جيتي على الوجع يا حبيبتي! يعني راجل زي ياسر، فرشلي الأرض حنة لحد ما اتجوزته… دلوقتي بقينا أغراب تحت سقف واحد!
ارتشفت عايدة من كوب الشاي ببطء، ثم سألتها بهدوء:
يعني كده من غير سبب؟ اتجنن ف دماغه مرة واحدة؟ ده كلام يا بت؟
هزت جنات رأسها، ووضعت كوبها على الطاولة، ثم قالت بصوت مكسور: ورب الكعبة… بعمل اللي يطلع ف إيدي، وقيدة له صوابعي العشرة شمع… ومفيش فايدة.
ثم التفتت تبحث بعينيها وقالت: هي البت حياه فين؟
أشارت بطة نحو وقالت : بتذاكر جوه.
أومأت جنات برأسها، ثم تمتمت بنبرة مكسورة خافتة:
ده حتى في النوم… معرفش جراله إيه! بقاله كام يوم وكل حاجة… تقضية واجب والسلام!
ضربت بطة صدرها بكفها وقالت متوجسة: ينيله الراجل ده! ده كان ع الجواز… يكون حد عمله عمل ولا حاجة يا بت!
صرخت عايدة فجأة، بانزعاج: عمل إيه وهبل إيه؟! العمل عمل ربنا يا أختي! وانتي يا بت، خليكي نغشة كده… كلي بعقله حلاوة يا هبلة، بلاش بوزك اللي أنا وانتي عارفينه ده!
وضعت جنات يدها على صدرها، وهتفت بمرارة: أنا والله أبداً! ده أنا ما سبتش حاجة إلا وعملتها… بس هو اللي جبله.
شهقت بطة، وقالت بحنقوحنون : بس يا بت! عيب يا ضنايا… اوعي تغلطي في جوزك، لا في حضوره ولا في غيابه. انتي سامعة؟
هزت رأسها في خضوع، وقالت بهمس:حاضر يا أما… ما هو اللي بيطلعني عن شعوري… الله!
……………………………………….
في قلب الصاغة، أمام محل عاشور الهواري…
تأرجحت اليافطات في الهواء الساخن، تزاحم الناس في السوق، وصوت دق الذهب يعلو ويخفت كنبض قلب متوتر.
كان عاشور الهواري جالسًا على كرسيه الخشبي ، يدخن سيجارته بتأمل، بينما الشرر يطل من عينيه.
هتف عاشور، بنبرة تشي بالوجع لا الغضب:والله عيب يا رجالة… سبتوا إيه للعيال؟! لو إحنا كمان بنلعبها كده؟
غمغم العتال بغيظ مكتوم وهو يطوي ذراعيه: يا معلم عاشور، يومها انت اللي حكمت… وقلت المزاد ده عشاني!
أومأ عاشور رأسه بتثاقل، كمن يحمل الجبل بين كتفيه: حصل… ما أنكرتش.
وأشار ناحية خليفة، وقال بحدة: بس إيه لازمة اللف والدوران؟ المعلم خليفة يدخل يعلي السعر؟ كده يبقى اسمه إيه؟! ده مش شغل معلمين يا جدعان.
هتف خليفة، محتدًا وقد انفجر صوته:يا عم افهم! يومها مراتك كانت تعبانة… وخفنا المزاد يطير منك وانت لسه مجيتش!
ضحك العتال بسخرية مرة، وقال بنبرة لاذعة: أومال لما جيت، ليه منسحبتش؟! ولا المزاد كان على مزاجك؟
رفع كتفيه وتابع باستخفاف : يمكن علشان كان فـ آخره… وفات وقت الانسحاب.
عندها، فقد العتال أعصابه، ونهض بضيق مكتوم تحول إلى زئير مكتوم: اللي حصل حصل… واللي في القلب في القلب. وأنا؟ عمري ما هاصفي ليك تاني الكلام قلة أحسن!
واستدار ومضى بخطوات غاضبة، تاركًا خلفه دخان التبغ ووجع الصدور.
ظل عاشور يرمقه بنظرات منكسرة، ثم التفت إلى خليفة وغمغم بأسى: عنده حق الراجل… مابيبصش فـ وشك. أنا قلتلك بلاش، بس إنت مفيش فايدة!
وقف خليفة فجأة، الأرض بقدمه: يا عاشور! بقولك ساعتها كانت ساعة … وراحت لحالها، خلاص! غلطت… وربك عالم، وندمان!
سكت لحظة ثم أردف، صوته يتهدج بالمرارة:الغلطة بنت دي كانت كفيلة تبوظ كل حاجة!
وقف عاشور، كأن الكلام نزف من قلبه، وقال بيأس:
ـ هتفضل حمقي كده؟! مفيش حد يعرف يوقفك! خسرت صاحب عمرك… عايز تخسر مين تاني؟!
أومأ خليفة وهو ينصرف، وجهه يشع وقلة حيلة:
خلاص… أنا عملت اللي عليا، وهو حر… كل واحد ينام ع الجنب اللي يريحه.
ظل عاشور واقفًا، يحدق في الفراغ، ثم زفر وغمغم وهو يدخل إلى محله: ربنا يهديك يا شقيقي…
……………………………………
ف مكتب خلف الحناوي .
في ذلك المكان الكائن في قلب المعركة الصامتة، حيث تنام الخطط بين الأوراق وتنسج المؤامرات في الظلال، جلس خلف الحناوي على مقعده كأنما يجلس على فوهة بركان على وشك الانفجار.
أصابعه تضغط على سطح المكتب بخشونة، وعيناه لا تكفان عن التوهج بشك دفين وغضبٍ متأهب.
دلف صلاح إلى الغرفة بخطى حذرة، يحمل في نبرته ما يشبه النبأ المشؤوم، وقال بنبرة ممزوجة بالحذر:فـي واحد اسمه المعلم حنفي الرشاش عايز يقابل حضرتك يا باشا…
لم ينظر له خلف في البداية، بل ظل مسبل العينين، غارقًا في أفكاره التي تشبه الأسلاك الشائكة، ثم تمتم بصوت خافت يقطر ضيقًا: دماغي مش رايقة أقابل حد دلوقتي… يا صلاح…
أومأ صلاح سريعًا، وكأنه خائف من تردد نفس زائد، ثم أضاف بنبرة ثقيلة:تحت أمرك يا باشا… نأجل المعاد… مع إن حنفي الرشاش لسه متعلم عليه من نفس الشخص…
هنا، التفت خلف إليه دفعة واحدة، كأن كلماته أشعلت فتيلًا كان ينتظر شرارة، عيناه تقدحان شررًا، وصاح بعنف: قصدك إيه يا حيوان إنت؟!
تراجع صلاح نصف خطوة، وكأن لسانه خان ، فابتلع لعابه بتوتر وسارع إلى تدارك نفسه: مش قصدي حاجه يا باشا… أصل حنفي الرشاش خسر منطقة الجمالية كلها… وميقدرش يوزع فيها ملي واحد… بسبب برضو سلطان الهواري… علم عليه هو ورجالته… فـ قلب منطقته! وخرجهم كأنهم ولاد مبارح! قفاهم يقمروا عيش… لا، ده مش يقمره، ده … وعشان كده هو عايز يقابل حضرتك…
عاد خلف يسند ظهره إلى المقعد، يضغط على أنامله بقوة وكأن بها سر التوازن، ثم قال بصوت حاد كالسكاكين: وأنا أعمله إيه دلوقتي؟!
اقترب صلاح بخطوة واثقة هذه المرة، وجلس أمامه وهو يحاول تثبيت نبرته : يا باشا… حنفي الرشاش عامل يلطم زي النسوان من ساعة اللي حصل… واللي هيقتله إنه مش قادر يقف في وش الجنرال لوحده!
فعشان سمع إن في خلاف بينك وبين سلطان، قال يمكن تلاقوا مصلحة تحطوا إيدكم في إيدين بعض… علي سلطان الهواري!!
ساد الصمت للحظة، قبل أن يهزّ خلف رأسه ببطء، يتأمل الأمر من زوايا خفية، ثم تمتم بصوت محمل بالدهاء: خليه اشوفه … في أقرب وقت.”
انفرجت شفتا صلاح كأنه نجا من أمر ما، ثم قال وهو ينهض: تمام يا باشا… بس احنا هنعمل إيه بظبط؟
تحرك خلف على كرسيه ببطء، استدار نحو النافذة الضيقة خلفه، كأنما يحدق في المجهول، ثم تمتم بصوت يقطر حقدًا دفينًا: طول ما الورق ده مختفي… إحنا متكتفين…بس خليك فاكر… كلهم لازم يبقوا تحت عينك…
يمكن البدري يكون سايب لولاده حاجة توصلهم للورق.
إحنا لازم نوصل له قبلهم… بأي شكل.
ولو… هم… وصلوا قبلي؟
يبقى… يحصلوا أبوهم… قبل ما يلحقوا يتصرفوا.
لم ينطق صلاح بكلمة، بل فقط أومأ برأسه، وعيناه تحاولان أن تبقى ثابتة، رغم الاضطراب الذي زرعه خلف في الأجواء، ثم نهض بخطوات ثقيلة وغمغم بصوت منخفض: تحت أمرك يا باشا…”
خرج صلاح من المكتب، وأغلق الباب خلفه بهدوء، تاركًا خلف الحناوي داخل دوامة من الحقد والتخطيط، دوامة تدور بلا رحمة، لا تعرف توقفًا، ولا تؤمن بالهدنة.
………………………………………..
فوق سطح منزل خليفة الهواري…
صعدت تقى بخطى خفيفة تحمل فيها شيئًا من طفولتها القديمة… تلك التي لم تكبر أبدًا. كانت تحمل إناء الحبوب بين يديها، وعيناها تلمعان بحنين دافئ، كأنها تصعد إلى عالمها الخاص، عالم الحمام.
فتحت أبواب الغيات، فانطلق الحمام منها كزخات نور نثرت في السماء. رفرفت أجنحته بعنف، ثم تفرقت على هيئة قلوب طائرة، تسبح في الفضاء المفتوح.
وقفت تقى تراقبهم بابتسامة هادئة. قلبها خفيف، كأن جناحين قد نبتا له. وضعت الحبوب في أماكنها، وسكبت الماء في المساقي، ثم جلست تطالع مشهد السماء وكأنها تشاركه حريته.
وفجأة…
يد ثقيلة، خشنة، حجبت ضوء الشمس عن وجهها، وصوت أجش همس خلف أذنها: وحشتيني يا طعم
شهقت تقى، وتراجعت عن الحمام وكأنما بتيار كهربائي، وصاحت بفزع: راجح! يا نهارك اسود… شيل إيدك يا غبي! حد يشوفنا!
لكنه من الخلف، وتمسك بها بعناد رجل لا يفهم إلا التملك. وهمس بشيء من الغل والضعف معًا: أنا غبي؟ عشان حبيتك؟! اخس عليكي يا تقى…
دفعت ذراعه بأسنانها، وعضته بقوة حتى تأوه، ثم أفلتت منه وركضت نحو زاوية السطح وهي تصيح: الله يخرب بيتك! انت ناوي توديني ف داهية! ولا أجيب أجلك بضربة واحدة؟!
اقترب راجح منها بخطوات عنيدة، وعيناه مليئتان بالغضب والخذلان، وقال: بصي… أبوي وأبوك ما بينهم الدنيا كلها. بس أنا بحبك، وعارف إنك كمان بتحبيني. يلا نحطهم قدام الأمر الواقع ونتجوز.
تراجعت تقى، وجهها صار شاحبًا، وصوتها خرج مرعوبًا:
اللهي يجوزك ف السرايا الصفرا يا راجح… ورحمة أمي لو ما بعدتش عني لقول لأبويا يشيلك من على وش الأرض.
لكنه تجاهل تهديدها، وتقدم أكثر، وقبض على ذراعها بقوة حتى آلمها، وقال بنبرة متحدية: اعملي اللي انتي عايزاه! أنا هخليكي انتي وأبوك تجروا ورايا عشان تتجوزيني!
صرخت تقى، ودفعت صدره بكل قوتها، عيناها تقدحان :أوعي يا حيوان! يا ابن الكلب! كل حاجة عندك بالعافية؟! يا تور… أوعي!
لكنه لم يستمع، زاد ضغطه عليها، ثم همس وهو يشدها إليه: بوسة واحدة… وهاسيبك. بس بسة!
كان ذلك كافيًا.
استجمعت تقى كل ما تبقى في من قوة وغل… وغرست أسنانها في منكبه بقسوة جعلته يصرخ:
آااه! يا بت العضاضة!
افلتها وهو يتألم، بينما هي تراجعت بعنف، تشهق وتشير له بإصبع مرتعشة: اتلم بقى! واحترم نفسك… بدل ما أبهدلك! انت اتجننت؟!
نزع راجح قميصه، وألقى به أرضًا، ناظرًا إلى آثار أسنانها الغائرة في جلده، ثم هدر بصوت حاد: احترام نفسي؟! طيب… أنا هوريكي الاحترام ع أصوله!
اقترب منها بخطى ثقيلة، مخيفة…
كأن الأرض تئن تحت قدميه.
تراجعت تقى حتى التصق ظهرها بسور السطح، وعيناها تبحثان يائستين عن مخرج، عن شيء تنجو به.
وفجأة، رأته… قالب طوب مهمل على السور، مغطى بغبار السنين.
مدت يدها المرتجفة، وقبضت عليه.
كان راجح يقترب… خطوتين… خطوة…
ثم هوت به على رأسه بكل ما تملك من يأس.
صدر صوت مكتوم… ثم ارتطام خافت، تبعه صمت ثقيل .
تراجع راجح خطوة، عيناه جاحظتان، ثم تهاوى أرضًا.
ظل جسده ساكنًا… كأنه لم يكن حيا قبل لحظات.
بقيت تقي مكانها، لا تتحرك، لا تتنفس.
تحدق فيه، في الدم الذي بدأ يتسلل من جبينه، وفي المنهار.
همسة بصوت ، والبكاء يخنق صدرها:يا نهار اسود… روحت في داهية يا تقى…
ثم اندفعت نحو الدرج، تتعثر في خطواتها، تلهث، ووجهها شاحب ، حتى بلغت باب .
أغلقته خلفها، وانزلقت إلى الأرض… بلا حراك.
