نظرت إليه بحيرة، وسألته بصوت متهدج: “حل إيه يا فندم؟”
نظر إليها مباشرة، وقال العرض الذي لا يعرف كيف خرج منه وكأن شىء داخله يدفعه نحو هذا : “جواز. يقفل بيه فم الناس، ويديكِ حماية حقيقية، ماليش فيها أي مصلحة غير إني… مش قادر أسيبك تواجهي الدنيا دي وحدك.”
الفصل الخامس
وقفت فرحة أمام مهاب، والكلمة التي نطق بها لا تزال تتردد في أذنيها: “جواز.” لم تكن تتوقع هذا العرض، رغم كل ما مرّ بينهما من اهتمام صادق، ولم تعرف كيف ترد على شيء بهذا الحجم في وقت لا تزال فيه تلملم شتات نفسها من فقدان أمها وخيبتها في أخيها.
قالت أخيرًا بصوت متردد: “يا فندم، إنت… إنت بتقول كلام كبير جدًا. إحنا أصلا منعرفش بعض.، ده غير ظروفي اللي أنت عارفها.”
رد مهاب بهدوء، محاولاً أن يوضح نيته دون أن يحرجها خاصة بعد أن ذكرت أمر ظروفها التي يعرفها تماماً :
“أنا عارف إن الكلام ده مفاجئ، وعارف إنه مش وقته المثالي. بس فكري في الموضوع بمنطق: إنتِ لوحدك تمامًا دلوقتي، والناس بدأت تتكلم، وأخوكِ في مصحة مش هيخرج قريب. الجواز ده هيوقف الكلام، وهيديكِ ظهر تستندي عليه قدام الناس كلها.”
توقف لحظة، ثم أضاف بنبرة تحاول أن تبدو عملية بحتة: “أنا مش بعرض عليكِ ده كـ شفقة، ده اتفاق بيننا أحنا الاتنين. إنتِ محتاجة وجودي جانبك، وأنا… أقدر أقدم ده ليكي. من غير أي التزامات تانية غير اللي احنا هنتفق عليه.”
لم يذكر شيئًا عن مشاعره، رغم أن شيئًا بداخله كان يعرف أن دوافعه ليست بهذه البساطة التي يصفها.
“وعيلتك يا فندم؟” سألته فرحة بقلق حقيقي، “إنت من عيلة كبيرة، وأنا… أنا بنت بسيطة، وأخويا مدمن. أهلك هيوافقوا على ده؟”
نظر إليها مهاب بتردد: “مش هكذبك، هيكون صعب. بس ده قراري أنا، مش قرارهم.”
فكرت فرحة طويلاً، تقلب العرض في ذهنها مع وضع كل الاحتمالات. لم تكن تبحث عن زواج “إنقاذ”، لكنها كانت تدرك حجم الوحدة التي تنتظرها، وحجم الكلام الذي سيلاحقها إن بقيت وحدها بلا سند في مجتمع لا يرحم.
قالت أخيرًا بصوت هادئ بعد أن تجدد اللقاء بينهما:
“أنا مش عايزاك تخسر حاجة بسببي يا فندم. لو حصل ده، أنا هحس إني السبب في خسارتك لعيلتك.”
رد مهاب بجدية: “أنا اللي عرضت عليكي الجواز وأنا مستعد لأي نتيجة.”
بعد صمت طويل، أومأت فرحة برأسها بموافقة صامتة، وعيناها مليئتان بمزيج من الامتنان والحيرة من مستقبل مجهول تمامًا، وهي لا تعرف أن في قلب هذا الرجل الواقف أمامها مشاعر لم يُفصح عنها بعد.
قرر مهاب أن يذهب للقاهرة ليخبر والديه بقراره وجهًا لوجه. جلس مع والده، السيد صالح، في مكتبه الفخم.
“يا بابا، عندي قرار مهم، وجيت أقولهولك بنفسي.”
رفع السيد صالح عينيه من أوراقه: “قولي يا مهاب.”
“أنا هتجوز.”
أشرق وجه والده للحظة: “أخيرًا! بنت مين؟”
“اسمها فرحة. دكتورة صيدلة، من البلد اللي أنا منقول ليها في الصعيد.”
تجمدت الابتسامة على وجه صالح فورًا:
” من الصعيد؟! سايب كل بنات القاهرة وعايز تتجوز من الصعيد.”
ثم أردف والده بحنق ” مهاب إحنا عندنا بنات عائلات، بنات ليهم اسم ووزن…”
وبسخرية واصل كلامه: “إنت عايز تتجوز من بلد إنت أصلاً منقول ليها تأديبيًا؟!”
دخلت والدة مهاب في هذه اللحظة، وقد سمعت آخر الجملة، وسألت بفضول ممزوج بقلق: ” عايز تتجوز واحده ما شفناهاش ولا عارفين عنها حاجة. حاسة إن في استعجال في الموضوع مش طبيعي يا مهاب.”
كانت ملاحظتها دقيقة أكثر مما تدري؛ فالسرعة التي اتخذ بها مهاب قراره كانت غريبة فعلاً على شخص يعرفونه بحذره الشديد في قراراته.
حاول مهاب أن يجيب دون أن يكشف كل التفاصيل: “هي بنت محترمة و دكتورة، بتشتغل في صيدلية وسبب سرعة قرار الجواز هو ظروفها الحالية”
سأل والده بحدة، وقد بدأ الشك يتسلل إليه: “ظروف إيه؟ إنت بتقولي كلام ناقص يا مهاب.؟”
تردد مهاب للحظة، غير راغب في أن يفتح تفاصيل عائلة فرحة أمام والديه بهذه الطريقة، خاصة أن الأمر لم يكن من حقه أن يُفشيه: “التفاصيل دي خاصة بيها يا بابا، وأنا مش هتكلم فيها. اللي يهمك إني متأكد من قراري.”
اشتد قلق والده: “كلام غامض كده يخليني أقلق أكتر يا مهاب مش أقل! إنت بتاخد قرار عمرك على أساس إيه بالظبط؟”
“على أساس إني عارف اللي بعمله،” رد مهاب بثبات، “وعلى أساس إني مقتنع بيه تمامًا.”
ضرب والده بيده على المكتب بغضب متصاعد: “أنا مش هوافق على جوازك من عيلة إحنا معرفنهاش! ولا حتى عارفين سبب الاستعجال ده! لو مصمم تكمل من غير ما توضحلنا حاجة، متفكرش إن حد فينا هييجي جوازك!”
نظرت والدة مهاب لزوجها ثم لابنها بقلق حقيقي، وقالت بصوت أهدأ: “يا مهاب، إحنا مش بنرفض بسبب الفقر أو المكان، إحنا خايفين إنك بتاخد قرار في وقت ضغط، من غير ما تدينا فرصة نفهم أو حتى نتعرف عليها.”
نظر مهاب لأمه، ثم لوالده، وقال بصوت هادئ لكنه حاسم: “أنا فاهم قلقكم، بس ده قراري، وأخدته وأنا واعي تمامًا. لو محتاجين وقت تتقبلوا الفكرة، أنا مستني، بس مش هرجع فيه.”
عاد مهاب للصعيد بعد أيام ثقيلة، محملاً بشعور مزدوج بين الحزن على برود استقبال أهله، والثقة في قراره. وقف أمام فرحة وقال بصوت هادئ واثق:
“قررت يا فرحة. هنتجوز، وأي حد رافض، ده مشكلته مش مشكلتنا.”
نظرت إليه فرحة بعينين مليئتين بالحيرة: “أنا مش عايزاك تخسر عيلتك بسببي يا فندم.”
“إنتِ مش السبب،” رد بابتسامة هادئة، “ده قراري، وخلاص.”
لمتابعة بقية القصة تابع صفحة “سحر الفيروز ” وستجد حكايات ممتعة.
قصة حب تحت القيود، يتم نشرها على صفحة ” سحر الفيروز
