قلب شايل

نسمة بخوف: أنا يا زياد مش معايا دهبك، أنا ماما كانت تعبانة جداً ومش كان معايا فلوس خالص، خفت أقولك إنني بعت الدهب وبحوش فلوس ومعايا مبلغ كويس وهكمل على المبلغ وفلوسك هتاخدها والله، أنا ماما كانت تعبانة جداً.

زياد: مهما تقولي مش هصدقك، أنا عايز فلوسي وشغل الأونطة ده مش ياكل معايا.

نسمة: انت إزاي بقيت كده! أنا لو كنت اتجوزتك كنت هعيش عمري كله ندمانة، انت قلبك مفهوش رحمة، لو مامتك تعبانة هتسيبها تعبانة ولا هتعالجها وتكون معاها؟ أنا أسفة إني بعت الدهب عشان أعالج ماما، بس والله العظيم أنا مش قولتلك عشان خايفة على زعلك، قدر ظروفي.

زياد وهو بيشد دراع نسمة: لا بصي، الفلوس لو مش جت النهاردة أنا هبلغ عنك وده حقي.

سابها ومشي ودموعها نازلة وهي بتبص عليه وهو ماشي، مصدومة وزعلانة إزاي في ناس بالقسوة دي، إزاي ناس مش في قلوبها رحمة؟ فضلت تبكي في مكان شغلها.
عم محمود شايف اللي حصل وهو قاعد على الكرسي ومش قادر يروح يواسيها، نظرته ليها شفقة وزعل عليها. عم محمود راجل مريض، قعد يبكي على اللي حصل بينها وبين زياد وهو مش قادر يعمل عشانها حاجة.

_عم محمود: تعالي يا نسمة أنا عايزك.
نسمة: نعم يا عم محمود؟
عم محمود: أنا شوفت كل اللي حصل، اعذريني يا بنتي مقدرتش أجي أدافع عنك وأكون في ضهرك، بس أنا هطلب منك طلب أتمنى توافقي.
نسمة باستغراب: أنا عينيا ليك يا عم محمود.
عم محمود: أنا معايا مبلغ كويس في البنك، هكتبلك شيك وخلصي نفسك يا بنتي منه وعيشي حياتك وشوفي مستقبلك.

قعدت نسمة تبكي عند عم محمود وهي مبسوطة من كلامه وإنها خلاص هتخلص نفسها منه وأن الدنيا لسه فيها خير.

مامت نسمة: اتأخرتي ليه يا نسمة في الشغل كده؟
نسمة: مساء الخير يا ماما، معلش كان الزباين كتير النهاردة، أخدتي علاجك؟
مامت نسمة: زياد إجا وفضل يزعق وعايز دهبه، هتعملي إيه؟
نسمة: ارتاحي دلوقتي وبكره هقولك.

دخلت نسمة اوضتها وبصت للسما وقعدت تبكي إنها هتاخد فلوس عم محمود الراجل الطيب الغلبان، وزعلانة على اللي حصلها، وكل اللي بتطلبه إنها تعيش مرتاحة البال.
نزلت نسمة الشغل بدري وهي فرحانة ومبسوطة إنها خلاص هتخلص نفسها من زياد.

نسمة: عم محمود، انت فين يا عم محمود!
عم محمود وهو مش قادر ياخد نفسه: تعالي يا نسمة أنا أهو.
نسمة بصدمة: عم محمود مالك! اسند عليا، انت حاسس بإيه؟
عم محمود: الحقيني يا نسمة.

جابت ناس تشيل معاها عم محمود من على الأرض وراحت بيه المستشفى وهي مبطلتش بكاء عليه.
نسمة بخوف ودموع: عم محمود انت هتبقى كويس صح؟
عم محمود: مش هرتاح ولا هبقى كويس غير لما تاخدي الشيك وتروحي تصرفيه وتيجي تفرحيني عشان هكون خفيت وأجي معاكي وانتِ بتسلميله الفلوس، ما أنا زي أبوكي وسندك يا بنتي.
نسمة: لا أنا مش هقدر أسيبك.
عم محمود: لما تيجي هنمشي مع بعض، دول شوية دوخة وهبقى كويس، يلا يا نسمة يلا.

راحت نسمة البنك وجابت الفلوس، وعلى قد ما كانت مبسوطة زعلت والفرحة اتقلبت حزن على الراجل الطيب اللي بيساعدها. جابت نسمة الفلوس وراحت لعم محمود تقوله وتطمن عليه.

نسمة: لو سمحتي، عم محمود كان في الاوضة دي، أنا مش لاقياه هو راح فين؟
الممرضة بنظرة حزن: البقاء لله وحده، عم محمود الراجل الطيب تعيشي انتِ، وصاني أقولك متزعليش، ونطق الشهادة وانتقل إلى رحمة الله.
نسمة بدموع شديدة وصدمة: لا عم محمود مش هيسيبني، قال إنه هيجي معايا والله هو قالي كده، عشان خاطري هو فين بالله عليكِ؟ أنا محتاجة عم محمود، هو فين!
الممرضة: ارضي بقضاء الله.

خرجت نسمة من المستشفى وهي في عربية إسعاف مع عم محمود عشان تتم إجراءات الدفن، وطول الطريق تبكي وهي بتبص ليه وبتكلمه.
عملت نسمة جنازة وعزاء لعم محمود بالفلوس اللي صرفتها من البنك، والفلوس خلصت في إجراءات الدفن والعزاء.

زياد: هتدفعي ولا الحبس؟ أنا صبرت كتير.
نسمة: أنا كنت هدفعلك فلوسك، بس في حد عزيز عليا اتوفى ومبقاش معايا فلوس، كان يستاهل أعمل أي حاجة عشانه ودي فلوسه كان هيدهالي. انت مهما عملت أو هتعمل فيا مش هحزن أكتر من حزني على عم محمود.

قفلت نسمة السكة في وش زياد وراحت السوبر ماركت وقعدت تبص على المكان اللي كان عم محمود بيقعد فيه وتبكي. المبلغ اللي كان مع نسمة الخاص بيها طلعت بيه صدقة على روح عم محمود وطلبت من الناس كلها تدعيله، وقغلت السوبر ماركت عشان تروح البيت تطمن على والدتها وإخواتها.

مامت نسمة: حاضر ياللي بتخبط، افتحي يا سلمى الباب بسرعة.
فتحت سلمى الباب والشرطة هي اللي كانت بره البيت.
زياد: هي دي أمها يا حضرة الظابط.
مامت نسمة: أنا يا بني! الله يسامحك.
الظابط: لو سمحتِ يا حجة، فين نسمة؟
مامت نسمة بدموع: والله يا حضرة الظابط بنتي تعبانة في الشغل عشان ناكل لقمة حلال أنا وإخواتها، بنتي عمرها ما إجت على حد ولا ظلمت حد. الراجل اللي بيقولك ده إنسان مش كويس، هي مش قادرة تدفعله دلوقتي وطلبت منه يستنى عليها شوية.

غادة وهي بتجري بره البيت وراحت تحت البيت عشان تشوف نسمة.
نسمة: مالك يا غادة؟ ماما كويسة؟
غادة: الشرطة فوق وعايزينك وزياد معاهم عايزين يحبسوكي.
نسمة: مش تخافي تعالي يا غادة، ولو روحت معاهم خلي بالك من ماما ومتعيطيش كده يا غادة.

زياد: أهي وصلت أهي.
الظابط بصوت عالي: انت متتكلمش تاني ومسمعش صوتك!
نسمة: أهلاً يا حضرة الظابط، أنا تحت أمرك بس أرجوك أطمن على ماما الأول وبعد كده تعمل اللي انت عايزه.

نسمة أمام القاضي وهي جريئة: مش هقول إني بريئة، بالعكس أنا غلطت إني بعت الذهب حق زياد، بس ممكن أسأل حضراتكم سؤال واحد؟ لو حضرتك يا سيادة القاضي مكاني كنت هتسيب مامتك تتألم؟ زياد ده لو في قلبه خير ورحمة كان عمل تنازل عن المحضر ده من كتر ما ماما تعبانة موجودة في البيت مع إخواتي البنات وأنا هنا النهاردة، والمحامي بتاعي ربنا.
القاضي: مش معاكي محامي يا نسمة؟
نسمة بابتسامة فيها سخرية: لا عشان معنديش أتعاب المحامي. أنا كنت هدفع لزياد فلوسه، كنت هشتغل ليل نهار بس هو أستعجل على حبسي. بس تعرف يا فندم؟ الدنيا دي صعبة أوي، أنا راضية باللي تحكم بيه أصل خلاص مش فارقة، كل اللي بطلبه من حضرتك تبعت حد يروح يطمن على ماما وإخواتي عشان لو حصل لها حاجة مش هسامح حد.
القاضي وهو مبتسم: صدقيني يا نسمة، الدنيا والناس لسه فيها خير، وإلا مكنتيش هتخرجي دلوقتي.
زياد وهو صوته عالي: يعني إيه تخرج دلوقتي وفلوسي!
القاضي بغضب: انت تمنع الكلام وإلا هحبسك!
نسمة بدموع كلها فرح: ده بجد؟ طب إزاي؟ مين دفع الفلوس؟ والله أنا بشكركم إنكم صدقتوني، أنا مش عارفة أقول إيه.
القاضي: كانت تبقى وحشة في حقي يا بنتي أحبسك عشان بتعالجي والدتك، إزاي تنقذي مريضة وإحنا مش ننقذ إنسانة زيك؟ الخير لسه فيكي يا بنتي ومش مع والدتك بس، بالعكس أنا متأكد إن لو حد احتاج مساعدتك مش هتتأخري لحظة.
نسمة وهي تبكي: أنا بشكر حضرتك كل الشكر.
القاضي وهو مبتسم: رفعت الجلسة لإنسانية نسمة.

فضلت نسمة تبص على القاضي وهي مبتسمة وبتحمد ربنا إن لسه الدنيا فيها خير وإنها دايماً قوية عشان كل مرة ربنا بيكون معاها. سابت نسمة المكان وراحت بيتها تشوف مامتها وإخواتها.

_ بيت نسمة _
مامت نسمة بدموع: ألف حمد وشكر ليك يارب.
نسمة: متعيطيش يا ماما، بكره هنزل السوبر ماركت عشان أجيب حاجة إخواتي وأعوضك عن كل حاجة يا ماما.
مامت نسمة: أنا عيزاكي دايماً تكوني بخير وربنا يبعد عنك الأذى.

دخلت نسمة اوضتها وراحت عند الشباك وشافت في نور جاي من بعيد من الشباك بتاع السوبر ماركت. نسمة خافت وقلقت يكون ده حد غريب ولازم تحافظ على مكان أكل عيشها اللي عمها محمود سابه أمانة بعد وفاته. كانت الساعة 2 بالليل والناس كلها نايمة، نزلت نسمة في سكوت عشان مامتها وإخواتها محدش يحس بيها.

_ السوبر ماركت _
نسمة بخوف: انت مين وبتعمل إيه هنا؟ أي حركة هبلغ الشرطة!
شافت نسمة واحد مصاب وهدومه متبهدلة وعمال يتوجع وماسك بطنه، نسمة قربت منه تشوف ماله.

_ انت كويس؟
على فكرة أنا ابن ناس والله، أنا بس مش فاكر أنا مين وحصلي إيه، أنا كنت لابس هدوم حلوة، فجأة لقيت نفسي جعان وهدومي متقطعة.
_ طب أنا هجيبلك أكل، اسمك إيه؟
صدقني معرفش، أنا جريت لقيت نفسي هنا، أنا همشي دلوقتي.
_ مينفعش أسيبك تمشي كده وانت في الحالة دي، مينفعش أسيب حد محتاج وأسيبه يمشي. أنا كنت من نص ساعة في الحبس ولولا فضل ربنا وإنسانية القاضي كنت زماني هناك، أبقى مستاهلش ده لو مشيت من غير ما أكرمك.
آه آه آه…
_ مالك؟ انت كويس؟ تعالى نروح عند الدكتور نطمن عليك.
لا، أنا بس عايز أكل وانا هبقى كويس.
_ السوبر ماركت ده كله تحت أمرك، شوف انت عايز إيه وانا أجيبلك، بص استنى أنا هجيبلك أكل جميل.

جابت نسمة أكل كتير جداً وأكلته وهو فضل ياكل وهي بتفكر إزاي شخص جميل كده وهو مش فاكر اسمه، باين عليه ابن ناس. زعلت نسمة عليه أوي ومستغربتش لأنها دنیا وكل من فيها مصاب. استنته لما أكل وشرب ولقت مرة واحدة نام، قفلت نسمة عليه وسابته وراحت بيتها وقالت في بالها بكره الصبح تيجي تشوف أكل عيشها وتفتحله يروح يشوف حاله.

_ غادة: نسمة اصحي أنا عايزة فلوس عشان أجيب كراسات جديدة.
_ سلمى: وانا يا نسمة وعايزة مصروف.
_ نسمة: حاضر، بس نفطر الأول وماما تفطر معانا.

فطرت نسمة وجهزت إخواتها للمدرسة وفطرت والدتها وجهزت نفسها عشان تنزل السوبر ماركت. نزلت نسمة ونسيت إن في واحد هناك هي قافلة عليه.
انت! أنا آسفة إني قفلت عليك، انت بس صعبت عليا أصحيك والله، انت كويس؟ ثواني هجيبلك أكل تفطر.
_ استني، أنا بس عايز أشكرك إنك أكرمتيني.
نسمة بابتسامة وهي باصة ليه: كان الله في عون العبد ما دام العبد في عون أخيه، مفيش بين المسلمين شكر، الشكر لله دايماً.
_ مستغرب إن كان في ناس بتجري ورايا عشان طلبت منهم أكل، وانتي بنت ومكانش عندك مشكلة في ضيافتي وانا شكلي غريب، كان حقك تخافي!
نسمة: أنا خسرت ناس كتير وخفت أكتر لما سابوني، مبقاش عندي حاجة أخاف منها تاني، بس عندي حاجات أخاف عليها زي ماما وأخواتي البنات. ثواني هجيبلك أكل.

مسك إيديها، وراحت نسمة ساحبة إيديها بشدة ونظرة كلها قلق واستغراب.
_ حقك عليا والله العظيم أنا مقصدش، أنا والله العظيم مش أقصد، أنا بس ضعفت قدام الإنسانية، أنا من يوم ما بقيت كده ومش شوفت ناس كويسة، حقك عليا آسف.
نسمة: حصل خير، بعد إذنك عايزة أشوف أكل عيشي، في زباين عايزة أشوف طلباتهم.

خرج الشخص ده وراح قعد قدام السوبر ماركت، وقعد ياكل من الأكل اللي نسمة بعتهوله مع زبون. هو استغرب من موقفها، وهي استغربت إنه مش أخد الفلوس اللي كانت في المحل آخر مرة.

زياد: القاضي دفعلي الفلوس، بس انتي لسه مديونة ليا بحاجات كتير.
نسمة بصدمة: انت جاي تعمل إيه؟ فلوسك أخدتها، عايز مني إيه تاني؟ روح منك لله يا زياد!
زياد بابتسامة كلها سخرية: عايزك انتي، أنا محدش ينتصر عليا خصوصاً لو كانت بنت!
نسمة بخوف ودفعته بعيد عنها: ابعد عني وإلا هتشوف اللي محدش شافه!

_ انت بتحب نسمة؟
سيف: أنا بحبها عشان طيبة، وبتقولي دايماً انت زي أخويا عشان أنا معنديش أخوات بنات، وبيتها قريب من هنا خالص، إحنا كمان جيران وبروح عندهم البيت ساعات لما بكون زهقان. أصل أنا معنديش صحاب وماما بتبعتني أجيب منها حاجات من هنا للبيت، ولما روحت أجيب منها حاجات قالتلي أجيب ليك الأكل واروح أخد طلبي يكون جهز.
_ طيب روح خد الحاجة عشان متتأخرش على مامتك.
سيف: هي قالتلي لما أجهز طلبك هبعتلك تيجي تاخد الحاجة، بس انت شكل حلو خالص، بس ليه لبسك مش مظبوط؟
_ انت صغير أوي ولسه بدري لما تعرف حاجة عني، عشان أنا والله برضه مش عارف.
سيف: أنا هروح عند نسمة، ماما دايماً تزعقلي عشان بقولها نسمة، بس عايزاني أقولها طنط نسمة، وهي مش بتحب أقولها غير نسمة بس.
_ بسيطة، قولها نسمة وقدام مامتك قولها طنط.
سيف: انت اسمك إيه؟
_ مش عارف، قولي أي حاجة.
سيف وهو بيفكر: هقولك أحمد.
_ حلو أحمد، يلا روح عشان مش تتأخر.

راح سيف السوبر ماركت وشاف نسمة بتقول: الحقوني! وصوتها كان مكتوم من إيد زياد. خاف سيف أوي وجري عند أحمد وقاله يلحق نسمة، في واحد هجم عليها وهي بتعيط.
جري معاه الشخص اللي بقى اسمه أحمد بسبب سيف.
نسمة بصوت عالي: الحقوني!
زياد: انتي النهاردة…

ونكمل الحلقات اللي جاية لو عجبتكم!
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”