روايات وقصص

نور واسد2

وبعد شوية تجهزت ونزلت وراحت على المطبخ وفي لحظة قالت: أثبت مكانك يا مختار والله ما أنا سيباكم غير متلبسين ومفضوحين قدام الكل في سرقة البسبوسة!
مختار: هموتيني ناقص عمر الله يخرب بيتك!
ليلي: أبوس إيدك استري علينا دي كانت عينة للتذوق!
أسد نزل وراحت عليهم.
نور قالت: أتفضل شوف أبوك وأمك بيعملوا إيه في الأكل، هي دي العيلة اللي إنت عاوزني أبقى واحدة منها؟ استغفر الله العظيم! (وخرجت).
مختار بيبص لابنه وساكت وأمه محرجة.
أسد بصلهم وقال: في إيه يا حاج هي قفشتكم وأنتو بتعملوا إيه بالضبط؟ (وبمكر قال): لا لا أوع تكونوا بتخلصوا صينية الحل لوحدكم!
أبوه بصله وراحت ضربة بهزار على صدره وخرج.

نور راحت عند جدتها لقت جَدها بيطبطب عليها وبيأكلها حتة فاكهة، ويقولها ربنا يخليكي ليا يا حجوّة.
قالت: استغفر الله العظيم هو أنا دخلت بيت محن ولا إيه؟ حتى إنت يا كبير بتأكلها في الخفاء؟
(وبصوت عالي قالت): والله لبلغ عنكم كلكم أنا خايفة على نفسي من أكلكم! الحقني يا أسسسسسسد الحقني يا حضرة الظابط الحووووني يا ناااااس!
جدها: اسكتي يا بنت الكلب فضحتينا!
أسد راح عليها وقالها: في إيه مالك يا نور؟
(حمزه وخالد وأبوهم وأمهم وياسمين وأميرة: في إيه؟).
نور: الحقني يا باشا أنا عاوزه أبلغ عن قضية سرقة طعام وأنا بنفسي مسكاهم بالجرم المشهود!
مختار: البت دي مقعدش في البيت دا تاني ولا دقيقة واحدة بعد كدا! (وبص لأسد وقاله): شوفلك مكان تاني تعيش فيه إنت وهي مستحيل تعيش معانا ولا حتى تجي زيارة.
نور: طبعا يا مختار ما هو دا اللي عاوزه علشان يخلالك صواني الحلو! (وبصت لجدها وقالت): مش هتقول حاجة يا حاج باعتبار إنك الكبير هنا؟
الجد بص لأسد وقال: من النهارده تلم هدومك وهدومها وتشوفولكم مكان تاني تعيشوا فيه.
نور: حتى إنت كمان يا معتز؟ طب والله لقول إني شوفتك… وقبل ما تكمل لقت جدها بيجري وراها بالعصاية بتاعتها هما الاتنين بهزار.
مختار كمان جري وقال: والله ما أنا سايبك غير مضروبة!
ليلي: إديها مترحمهاش دي فصيلة! (والعيلة كلها هههههههه هههههههه).
نور وهي بتجري قالت: بتحوش عني يا سي أسد ولا إنت مش جوزي مثلاً ولا خايف من عصاية الجد؟
أسد: ولا أعرفك!
نور: طيب حوشهم إنت يا حمزه وأنا مش هقولهم إنك بوست.. أقصد أكلت ياسمين الشوكولاتة إمبارح في الجنينة بعد كتب الكتاب!
حمزه قال: أرجع من الشغل ملقيش البت دي في البيت! ومشي وهو بيبرطم.
أمه: مش هتفطر يا بني؟
حمزه: مش طافح!

نور مازالت تجري وجدها وعمها بيجروا وراها.
خالد: والله تستاهلي.
نور وهي على السلم قالت: مبلاش إنت يا بتاع الكيكة الخفية!
خالد (بهمس قال): الله يكسفك يا بعيدة! (وبص لأميرة وقالها): هي مركبة كاميرات في البيت؟ هي عرفت منين؟!
أميرة وشها أحمر ومش عارفة ترد.
جدها وأسد واقفين على أول السلم وجدها بيقول: تعالي يا نور يا بنتي خلاص مش هعملك حاجة فرهدتيني من الجري وراكي والله ما هقدر أضربك تعالي يا حبيبتي.
نور بصلته وفهمت إنه بيضحك عليها، وفي لحظة وهي ع السلم راحت ناطة على ضهر أسد وقالت: على برا وإياك تنزلني غير في العربية أجريييييي!
أسد أخدها وجري والكل بيضحك.
مختار قال: البت دي هتجبلي جلطة عن قريب.
أمه: يا خويا متحترم نفسك الأول وتنسى أكل الحلو!
مختار: ما بلاش إنت يا حجة!
أمه: حسبي الله ونعم الوكيل.

في عربية أسد:
أسد: ههههه هموت يخربيتك إهدى بقا وحلي عنهم!
نور: الحق عليا إني بفرفشهم وأغيرلهم مود الكآبة اللي هما عايشين فيه دا!
أسد: تغيري مودهم بأنك تفضحيهم في صواني البسبوسة؟!
نور: هههههه ما الكل عارف ومحصلش حاجة خطيرة!
أسد: هههههههه (ومال على إيدها وباسها).
نور بكل حب قالت: ربنا ميحرمني منك أبداً يا عمري.

وبعد مرور أسبوع:
أسد خبط على نور ودخل وقالها: جاهزة يا قمر؟
نور: دقيقة ونازلة.
أسد: تمام أنا هنزل وإنتي خلصي براحتك.
نور: أوك يا قلبي.
وبعد شوية خرجت من أوضتها وشافت أمل مرات عمها ماهر بتقول: خلاص يا حبيبي متزعلش مني علشان خاطري سامحني دي الكيكة اتحرقت، (ومالت تعتذر له).
راحت نور مصوتة وقالت: الحقوووووني يا فضيحتييييي يا سوادك يا جديييييييي يا فضحتك يا معتز وسط كبرات البلد!
عمها ومراته بصولها وهما هيموتوا من كلامهم.
أسد والجد والعيلة كلها جريوا على فوق وقالوا: في إيه؟!
نور قالت: يا فضيحتك يا معتز يا جوهري، بيتك بقا كأنه مأتم على كيكة اتحرقت! يا ترى إنت عملت ايه في دنيتك علشان ربنا يعاقبك وتشوف كدا في عيالك؟ ينفع كدا أبقى ماشي في حالي ويشاء السميع العليم أشوف الست دي بتعتذر عشان الأكل اتحرق وأحنا كلنا نايمين!
ماهر: أنا يا بت اتحرق أكلي؟!
أمل ميتة من الإحراج قدام الكل.
جدها: حسبي الله ونعم الوكيل فيكي معتش فيا حيل من يوم ما جيتي وأنا طالع نازل عالسلم فرهدتيني من الجري!
حمزه قالها: يخربيتك أمي هتموت من الكسوف!
نور: تستاهل حد قالها تحرق الكيكة؟!
أسد راح مسكها من قفاها ونازل بيها.
نور: ليه كدا يا باشا؟ أنا كنت فاكرة ماهر طيب طلع بيحب الأكل!
أسد: إكتمي بقا وشي بقا في الأرض من عمايلك في الناس!
نور: ما هما اللي مبيستروش على طبخهم!

أسد راح ع السفرة وقعدها جنبه وقالها: ع الله تروحي لأي مكان فاهمة ولا لأ؟
نور: طيب أروح المطبخ أساعدهم؟
أسد: لا أمي هناك.
نور: ومختار فين أنا لازم أروح أشوفه!
أسد: تصدقي معاكي حق اختفى كدا فجأة.
نور: يا لهووووي سيبني أروح أبوس إيدك الحقهم قبل ما يخلصوا الأكل لوحدهم! (وبتقوم).
أسد شدها وقالها: والله ما إنتي قايمة من مكانك!
نور راحت معليّة صوتها وقالت: يا مختااااار إنت يا راجل إنت تعالى هنا مختاااار مختاااااار إنت يا مختااااار!
عمها مختار طلع من أوضة المكتب وقالها: عاوزه إيه ياللي تنشكي في لسانك؟
مختار: إنت كنت فييييين؟
نور: كنت في المكتب مع جدك بتخططوا للأكل!
مختار: أحم وأنا اللي كنت هظلـمك يلا متعوضة المرة الجاية!
أسد: ههههه (والكل اتجمع ع السفرة).
نور قالت: كله تمام موجودين كلكم؟
حمزه قالها أه يا ختي إطمني.
نور: لا أنا مش مرتاحة، أنا هنادي عليهم واحد واحد واللي مش هيرد يومه أزرق وطبعا عارفين هعمل إيه!
أسد شدها وقال: إهمدي بقا.
نور: سيبني! (وقالت): نبدأ بالكبير قوي، (وقالت): الحاج معتز موجود؟
أسد راح قايم ومسكها من إيدها مقومها وقايلها: والله ما إنتي قاعدة معاهم عالأكل! (ووقفها في نص الصالة وقالها): مكانك على ما أجب حاجة من المكتب.
نور بتبوصلهم وتقول: هتسيبوني كدا معاه ينتقم مني ويعذبني؟
ياسمين: نعملك إيه يعني بعمايلك دي؟
نور: تزعلوا عليا وتلطمووو، بس بما أنكم عيلتي حبيبتي هتلطموا لطم جماعي منا مش أي حد بردو يلا اللطموووووا!
أسد خرج من المكتب وقال: نوووور!
نور: اللطموووووح حلو قوي قوي يا باشا بالكت إنتي أنا لو معنديش طموووح وآمال مكنتش هبقي معاك دلوقتي!
أسد قالها إنتي مفيش فايدة فيكي! (وبص قدامه لقي ع الترابيزة شريط لاصق أخذه، وفي لحظة حطه على بوقها بلطف عشان تسكت).
نور: أإممممم أمممممم ومش عارفة تتكلم.
أسد قالها: للأسف لازم أعمل كدا علشان هخلص شوية شغل قبل ما أمشي. (ولفها ورجع إيديها الاتنين ورا ضهرها وربطهم بالشريط اللاصق وأخدها قعدها ع الكرسي وققالها): ع الله بقا تتحركي!
العيلة كلها بتضحك عليها وفرحانة فيها.
نور قاعدة عمالة تحاول تتحرك.
ياسمين بعد شوية راحت عليها ولسه هتفكها.
أسد شافها من المكتب وقالها: سيبها ولا عاوزاها تتكلم وتجيب سيرة الشوكولاتة تاني؟!
ياسمين بصلتها ورجعت لورا تاني وبعدين قالت: عمايلك السودا هي اللي خلتني أرجع!
نور بتبوصلهم وعمالة تهز دماغها.
حمزه قام وفكها ولسه واقف جنبها.
نور راحت ضرباه ضربة خفيفة على كتفه وقالت: والله لفضحكم يا كلاب كلكم أنا عارفة أنكم بتسرقوا الحلو!
حمزه قبل ما يكمل راح شايلها بهزار وفتح الباب ورميها برا وقفل!
أسد شافهم وضحك.
نور عمالة تخبط عالباب تقول: إفتح يا كلب إن ما وريتك إفتحووووو! وعمالة تخبط.
أسد خلص شغل وراح يكمل في داره.
نور لفت ودخلت أوضة المكتب وراحت ناطة من الشباك وتسحبت ودخلت وقالت: بقا كدا يا كلاب بتضحوا بيا؟!
الكل بصلها بذهول.
خالد: هي جت منين؟!
حمزه: إنت دخلتي إزاي؟!
نور: من الباب يا عيا هيكون منين يعني إيه الأسئلة الغير منطقية دي؟
حمزه بصلها وقال: غير منطقية إزاي وأحنا كلنا قاعدين أهو والباب مقفول؟!
نور راحت قاعدة بعيد عنهم وبصلتهم نظرة هما فهموها، وبعدين قالت: حمزه، أسد، خالد، ياسمين، أميرة، عاوزة ساندوتش لانشون وبيض وجبنة ومربة وشيبسي وكانز ونسكافيه في خلال دقيقة يكونوا قدامي!
الكل خاف وبيجهزولها اللي طلبته بسرعة، وبعد لحظات كانوا قدامها وبيقولولها: اتفضلي يا ست البنات.
نور أخدت الأكل منهم وبتاكل بسعادة، وبعدين بصت لعمها مختار وقالت: مختاااار!
مختار ضغط على سنانه وقالها: خير يا عملي الأسود؟
نور قالت: ضربت عيل في الجامعة علشان خد ساندوتش بتاعي وقالوا عاوزين ولي أمرك الساعة عشرة تجيني وإلا… (ورفعت حاجبها).

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى