امراه بين نارين

– سيلا: “يا عمر… أنا مش مطمنة للخطوة دي…”
عمر قرب منها، جبهته مشدودة، وحاول يطمنها بنبرة هادئة:
–: “بس انا صليت استخارة… ومرتاح… حاسس إنها هتكون نقلة كبيرة أوي ليا… مش بس كده، ده مجهود سنين اخيرا بحصده ياريت اشوف منك تشجيع مش خوف بدون داعي.”
– سيلا: “انت مجتهد… قدمت ف كذا شركة بالفعل… ليه بقا تختار تحديدا الشركة دي؟”
– عمر: دي من أكبر الشركات على الساحة… فرصة عمري مش عايزها تضيع من بين إيديا.”
– سيلا: “انت مصمم… مش هعرف أغير قرارك.”
ابتسم عمر بابتسامة نصفها تحدي ونصفها حب:
– عمر: “اقنعيني… اديني سبب واحد يخليني أرجع خطوة ورا.”
سيلا حاولت تتحدث، لكن كلماتها اختنقت في حلقها، شعرت بأن صوتها ضاع، كأن عقلها اتشل للحظة.
عمر لاحظ صمتها، اتكأ على ظهر الكرسي، ونظر لها بحدة وحنان:
– عمر: “شوفتي سكوتك معناه… معندكيش سبب. يبقى هتصل بيه وابلغه إني موافق ابدا من الوقت اللي هو يحدده.”
..
تاني يوم، جلسا على مائدة الفطور.
– عمر (بابتسامة وهو يسكب الشاي): “اعملي حسابك… النهاردة تاخدي اجازة من الشغل، لأنه عندنا ضيف مهم. عايزك تحضري له حاجة تخليه ميعرفش ينساها… لحد ما يموت!”
رفعت سيلا حاجبيها بدهشة، وارتجفت شفتاها قليلًا من الفضول والخوف معًا:
– “مين الضيف ده ياعمر؟”
نظر إليها عمر بعينين مليئتين بالغموض والمرح، وابتسامة تتراقص على شفتيه:
– “لما ييجي هتشوفيه بنفسك… بس ابدأي التحضير من دلوقتي، لأنه جاي ع المغرب. أنا عندي كام مشوار هخلصه بسرعة وبعدين هرجع. يلا سلام ياحبيبي”
…
:
عند المغرب، كانت سيلا منهمكة في تحضير الطعام، يداها تتحركان بسرعة بين المقادير والأواني، وقلبها يدق بحماس وارتباك في الوقت نفسه. الرائحة الزكية للأكل ملأت المطبخ، لكنها لم تستطع منع توترها من الارتفاع مع اقتراب ساعة وصول الضيف.
فجأة، خُبِط الباب بخفة، فتوجه عمر بسرعة وفتحه بحماس. دخل الضيف، وعيناه تجولان في كل زاوية من البيت، تتأمل التفاصيل الصغيرة وكأن كل شيء جديد بالنسبة له.
– عمر (مبتسمًا وهو يرحب): “نورتنا ياتميم بيه!”
سمعت سيلا الاسم، فشعرت برعشة تمرّ في جسدها، وكأن قلبها توقف للحظة. لم تكن متأكدة إذا ما كانت قد سمعت الاسم بشكل صحيح. دفعت قدميها بسرعة خلف المطبخ لتتجنب أن يلاحظها، لكنها لم تتمكن من الاختباء تمامًا.
نظرت عبر الزاوية، فرأت تميم يجلس الآن بجانب عمر، يتحدث معه بصوت هادئ، وعيناه تحملان لمحة من الغموض والشر،
…
جلس الثلاثة حول مائدة الطعام.
الأطباق كانت مصطفّة بعناية، وروائح الطعام تملأ المكان، لكن الجو لم يكن هادئًا كما يبدو. سيلا كانت تجلس صامتة، عيناها تهربان من النظر إلى تميم، بينما كان عمر يتحدث بحماس واضح.
تذوّق تميم لقمة، ثم هزّ رأسه بإعجاب.
– “الأكل حلو أوي.”
ابتسم عمر بفخر، ونظر إلى سيلا بحب.
– “مراتي اللي عاملاه.”
رفع تميم نظره نحو سيلا، وعيناه تحملان نظرة غامضة.
– “تسلم إيدك يا مدام.”
سيلا اكتفت بإيماءة خفيفة برأسها دون أن تنطق بكلمة.
تأملها تميم للحظة، ثم قال بنبرة مستفزة قليلًا:
– “هي خرسا ولا إيه؟”
اعتدل عمر في جلسته بسرعة.
– “لا لا… بتتكلم عادي.”
ابتسم تميم ابتسامة خفيفة، لكنها كانت تحمل شيئًا من السخرية.
– “يبقى أكيد وجودي تقيل على قلبها.”
لوّح عمر بيده نافياً وهو يضحك.
– “لا يا راجل… دي فرحانة جدًا بحضورك. دي عملت كل الأكل ده لوحدها عشان خاطرك… هي دايمًا بتكرم الضيف. مش كده يا حبيبتي؟”
رفعت سيلا رأسها أخيرًا، ونظرت مباشرة إلى تميم بعينين باردتين.
– “هو مين اللي عازمك يا تميم بيه؟”
تجمد عمر في مكانه، ونظر إليها بصدمة.
– “سيلا!”
ثم قال بجدية خفيفة:
–: “أنا اللي عازمته… عشان يبقى بينا عيش وملح. والراجل كان متواضع جدًا وقَبِل الدعوة.”
ابتسم تميم بهدوء، ومسح فمه بالمنديل.
– لأن أي حد بيشتغل عندي… بحب يكون بينا صداقة. ده بيأثر جدًا في جودة الشغل ونجاح فريق العمل.”
هزت سيلا رأسها بسخرية خفيفة.
– “مدرسة غريبة.”
رفع تميم حاجبه مبتسمًا.
– : “عشان كده أنا من أنصارها.”
ثم أخذ نفسًا ببطء، وكأنه يستمتع باللحظة.
– : “بس تعرفي يا مدام… ريحة أكلك فكرّتني بشخص عزيز عليا أوي.”
نظر إليه عمر باهتمام.
– “مين يا تميم بيه؟”
اتكأ تميم على الكرسي قليلًا، وعيناه لم تبتعدا عن سيلا.
“واحدة… كنت مرتبط بيها زمان.
كنا مع بعض في الجامعة… حبينا بعض أوي.”
انخفض صوت سيلا وهي تمسك الملعقة بقوة.
أما تميم فأكمل كلامه ببطء متعمد.
“بس طلعت سلبية…
محاربتش أهلها عشاني.
أبوها رفضني عشان كنت على قدي.”
سكت لحظة، ثم أكمل:
“سافرت دبي… اشتغلت… تعبت سنين… وأسست شركتي هناك.
ولما رجعت… لقيتها متجوزة.”
تنهد عمر بتعاطف.
– “ملكش نصيب فيها… ربنا قادر يعوضك.”
ابتسم تميم ابتسامة باردة، وعيناه ما زالتا مثبتتين على سيلا.
“بس أنا مش عايز غيرها.”
ساد الصمت للحظة.
ثم قال ببطء شديد:
“وهاخدها… حتى لو عايشة في عرين الأسد.”
ارتجفت يد سيلا قليلًا فوق الطاولة.
أما عمر… فكان يظن أن تميم يتحدث عن قصة قديمة لا علاقة لها بشيء.
لكن عيني تميم كانت تقول شيئًا آخر تمامًا.
….
بعد أن انتهت الزيارة وغادر تميم، عمّ الصمت أرجاء المنزل.
دخل عمر الغرفة وهو يفك ساعته ويضعها على الكومودينو، بينما لحقت به سيلا بخطوات سريعة، وملامح الغضب مشتعلة على وجهها. أغلقت الباب خلفها بعنف، ثم التفتت إليه
انت ازاي تجيب راجل غريب البيت وتقعده معانا من غير حتى ما تقولي؟
نظر إليها عمر باستغراب واضح.
غريب؟! ده صاحب الشركة اللي هشتغل فيها.
اقتربت منه خطوة، وصوتها يرتجف بين الغضب والقلق.
حتى لو… المفروض أعرف! تحطني قدام الأمر الواقع كده ليه؟
زفر عمر بضيق.
يا سيلا دي مجاملة بسيطة… الراجل قبل الدعوة وجيه بكل ذوق.
ضحكت سيلا بسخرية.
مجاملة؟! كنتوا قاعدين تضحكوا وتهزروا وكأنكم أصحاب من سنين… وتحكيله عن شغلك وعن حياتنا كمان.
مرر عمر يده في شعره محاولًا السيطرة على أعصابه
أنا عايز علاقتي بيه تبقى كويسة
رفعت سيلا حاجبيها بحدة.
العلاقة الكويسة تبقى في الشغل… مش في البيت.
نظر إليها عمر لأول مرة بحدة.
هو إيه اللي مضايقك بالظبط؟
سكتت لحظة، وكأن الكلمات عالقة في حلقها، ثم قالت بعصبية:
كان بيبصلي بطريقة مش مريحة.
هز عمر رأسه بنفاد صبر.
أنا كنت قاعد قدامكم… والراجل ماعملش حاجة غلط. انتي مكبرة الموضوع.
اقتربت منه أكثر، ونبرتها أصبحت حادة.
يا أنا… يا الشغل ده.
تجمد عمر في مكانه.
إيه اللي انتي بتقوليه دة؟
سيلا
لو اشتغلت مع الراجل ده… أنا مش هقدر أكمل. معاك
اتسعت عينا عمر بذهول ممزوج بالغضب.
ده شغل حلمت بيه سنين!
سيلا:
والحلم ده ممكن يبقى كابوس.
صمت لحظة وهو يحدق فيها بتركيز، ثم قال ببطء:
في حاجة بينك وبينه يا سيلا؟
اتسعت عيناها بصدمة.
إيه؟! طبعًا لأ!
ظل ينظر إليها وكأنه يحاول قراءة الحقيقة في عينيها، ثم قال ببرود:
يبقى ما تحطيش نفسك بيني وبين مستقبلي.
شعرت سيلا بوخزة مؤلمة في قلبها.
أنا بحاول أحمي بيتنا.
ابتسم عمر ابتسامة خفيفة، لكنها لم تصل إلى عينيه.
يبقى قولي الحقيقة الأول… عشان أنا بدأت أحس إني عايش مع واحدة معرفهاش.
ثم استدار نحو السرير وقال ببرود:
تصبحي على خير.
وقفت سيلا مكانها، تنظر إلى ظهره بصمت.
وفي داخلها كانت متأكدة من شيء واحد فقط…
أن دخول تميم إلى حياتهما
لن يمر بسلام.

كان المبنى أشبه بمدينة صغيرة قائمة بذاتها؛ سيارات فارهة تدخل وتخرج من الجراج، وموظفون أنيقون يعبرون البوابة الإلكترونية بسرعة ونظام.
تنفس عمر بعمق، وهو يشعر بمزيج من الفخر والرهبة.
عمر (في نفسه):
“وأخيرًا وصلت لهنا… والمجنونة بتقولي يا أنا يا الشغل .. تيجي بس تشوف المكان اللي هشتغل فيه والمرتب اللي هاخده من هنا… ده ممكن ينقل عيشتنا في حتة تانية خالص.”
عدل ياقة قميصه بثقة ثم دخل.
في الداخل كان كل شيء منظمًا بدقة؛ أرضية رخامية لامعة تعكس الأضواء، وشاشة كبيرة خلف مكتب الاستقبال تعرض شعار الشركة.
ابتسمت له السكرتيرة.
السكرتيرة:
حضرتك أستاذ عمر؟
عمر:
أيوه.
السكرتيرة:
أستاذ تميم بيه مستني حضرتك. الدور الخامس… المكتب الرئيسي.
شكرها عمر واتجه نحو المصعد.
داخل المصعد كان قلبه يدق أسرع من المعتاد.
ضغط زر الطابق الخامس، وظل ينظر إلى انعكاس صورته في المرآة الصغيرة.
عمر (متمتمًا):
إن شاء الله بداية خير.
توقف المصعد أخيرًا.
خرج إلى ممر طويل مفروش بسجاد داكن، وعلى الجدران لوحات حديثة وشهادات تقدير.
وصل إلى باب خشبي كبير كُتب عليه:
Tamim
تردد لحظة… ثم طرق الباب.
تميم من الداخل:
اتفضل.
دخل عمر.
كان المكتب واسعًا جدًا، تحيط به نوافذ زجاجية تطل على المدينة بأكملها.
جلس تميم خلف مكتب كبير من الخشب الداكن، يقلب بعض الأوراق بهدوء.
رفع عينيه عندما دخل عمر.
ابتسم ابتسامة خفيفة.
تميم:
أهلاً… أستاذ عمر.
اقترب عمر وصافحه.
عمر:
صباح الخير يا تميم بيه.
أشار له تميم بالجلوس.
تميم:
اقعد… وقولي، إيه رأيك في المكان؟
نظر عمر حوله بإعجاب واضح.