قبضت ضي على ذراعها، تحاول تدليكه عسى أن يعود الدم المحبوس إلى شرايينها من جديد. الدموع تهطل من عينيها كالمطر، ثم صاحت بتمرد وحرقة: Barbaric and backward!
ضرب سلطان باب السيارة بقبضته وصرخ: بتبرطمي؟! بتقولي إيه يا بت؟!
قفزت برعب، وصاحت بهستيريا: مبقولش… مالكش دعوة بيا!
هز رأسه بحنق، ثم دار حول السيارة، وصعد بجوارها، وانطلق كالسهم، كأن السيارة نفسها تتحمل جنونه، تاركًا خلفه سحابة من الغبار… تشهد أن عاصفة غضب مرت من هنا، واسمها سلطان الهواري..
في الطريق، ساد الصمت إلا من شهقات ضي المتقطعة، ونحيبها المختنق، بينما سلطان يقبض على المقود كمن يحاول خنق غضبه بين كفيه.
وما إن وصلا إلى المنزل، حتى فتحت ضي الباب، وركضت إلى الطابق الاول ، وطرقت على باب شقة عايده بجنون، وسلطان خلفها بخطوات مشتعلة.
فتحت عايدة الباب بفزع، وما إن رأت وجه ضي حتى صاحت:ـ في إيه يا نهار إسود! ضي مالك يا بنتي؟!
ارتمت ضي في حضنها، وصاحت بنحيب متقطع : الحقيني يا طنط!
لكن سلطان لم يمهلها كثيرًا، بل جذبها من بين ذراعي والدته كمن ينتزعها من العالم، وهدر بوجه عابس:
تعالي معايا… لينا شقة أربيكي فيها!
حاولت ضي أن تفلت منه، تضربه، تصرخ:أوع! سيبني بقا!
تشبثت بها عايدة وهي تصيح برجاء: في إيه يا سلطان؟! براحة يا ابني مش كده!
أشار لها سلطان بحدة، وصوته ينطق بالحسم: عايدة… مش عايز حد يدخل ما بيني وبين مراتي… هنحل مشاكلنا لوحدنا.
سحب ضي نحو المصعد، ودلف بهما إلى الداخل، بينما تقاوم وتنتحب، ويداها تضربان على صدره دون فائدة.
وقفت عايدة مذهولة، تضرب كف بكف، حين خرجت بطه من شقتها وقد بدا على ملامحها أثر النوم، وهتفت بفزع:
يا فتاح يا عليم! يا رزاق يا كريم!… على الصبح؟! في إيه يا أختي؟!
أشارت لها عايدة إلى الأعلى وقالت:هيكون إيه غير سلطان وضي؟… مش عارفة عملت له إيه، جاي من بره شايط، والعفاريت راكباه!
تنهدت بطه وقالت بصوت منخفض: يا خوفي نكون ظلمنا البت دي بجوازها من سلطان… ونشيل ذنبها يا أختي… دي احنا معانا ولايه يا عايدة؟
هزت عايدة” رأسها، وقالت بحنان: متقوليش كده يا بطه… الشر بره وبعيد. سلطان طيب، بس هي تفهمه وتحبه، وهيبقى زي السمن على العسل.
دلفت حياة في تلك اللحظة، عائده من الخارج، وسمعت آخر جملة من عايدة فضحكت وقالت بخفة ظل:
أو زي النار على بنزين!
ردت بطه بغيظ وغمغمت: تف من بقك يا اللي تنشكي!
ضحكت حياة ثم بصقت تمثيليًا على الأرض وقالت: أهو يا بطوط!
قهقهت عايدة، ثم سألتها برقة:ها يا غلابوية… عملتي إيه في الامتحان؟
رفعت حياة رأسها بابتسامة وأجابت:هندسة… إن شاء الله.
هتفت بطه بدعوة صادقة: ربنا ينجحكم يا حبايبي… ويلا اتغدي عشان تذاكري المادة اللي بعدها.
أومأت حياة برأسها، ودلفت إلى الداخل، تتبعها بطه وعايدة، بينما خلف الأبواب… كانت نار الحب والغضب تشتعل بلا هوادة.
في الطابق العلوي…
انفتح باب الشقة بعنف، ودفعت ضي إلى الداخل كأنها أسيرة تقاد إلى مصيرها، ثم دخل سلطان خلفها وأغلق الباب بقوة جعلت الجدران نفسها ترتعد من شدته….
تراجعت ضي بخوف، ظهرها يكاد يلتصق بالجدار، وعيناها تتسعان كأنها لا تعرف هذا الرجل الذي يقف أمامها.
صرخت بتوتر وارتجاف: إنت أكيد مش طبيعي… إنت محتاج تتعالج!
اقترب منها بخطوات مشتعلة، وصوته يهدر في أرجاء الشقه كالرعد: محتاج أتعالج؟! عشان بغير على مراتي؟! عشان مش قادر أستحمل حد يلمسها وأنا واقف زي الخـ… كده عادي؟!
قبض على ذراعها بعنف جعلها تئن من شدته، وصاح بعينين تقدحان نارًا: لو أنا كده، يبقى طبيعي وعاجبك وعلى كيفك يا بت البدري… صح؟!
دفعها دفعة أفقدتها توازنها، ثم أكمل بصوت يغلي بغضب أعمى: لازم أسيبك تمشي على حل شعرك، وتلبسي المحزق والملزق، وكل عـ**… يقرب ويضحك، وده صاحبي وده زميلي، وده يحسس وده يطبطب، وأنا أسكت؟! عشان أعجب؟!
شهقت ضي، وتجمعت الدموع في عينيها المرتجفتين، وهمسة بصوت ممزق من الخذلان والذهول: إنت شايف إني كده؟… وإني عايزة ده؟!
في تلك اللحظة، كأن السكين التي أطلقها لسانه قد ارتدت إلى صدره.
نظر إليها، ولم ير أمامه إلا طفلة جرحت من أقرب الناس. صوتها المهتز تسلل إلى قلبه كطعنة بطيئة. رأى وجهها الشاحب ، ودموعها العالقة، وتلك النظرة التي تشبه من رأت شبحا. كأن ما قاله قد انقض على روحه هو الآخر.
تنفس بصعوبة، كأن أنفاسه ثقيلة لا تخرج إلا بانتزاع، ثم تراجع بخطوات ثقيلة كأن كل خطوة تنزع من قلبه. لم ينطق بحرف. فقط… فتح الباب، وخرج. أغلقه خلفه بعنف، لكنه بدا في تلك اللحظة أضعف من أن يغلق شيئًا… حتى على نفسه.
تجمدت ضي في مكانها، كأن برد كلماته ضرب أطرافها فشلها. عيناها تحدقان إلى الفراغ، وقلبها يرتجف. كل حرف نطقه كان كالرصاص… أصابها في قلبها، وامتد أثره حتى أطراف روحها.
تراجعت ببطء، ثم سقطت على الأريكة، لا تدري أكان ذلك سقوط جسد، أم سقوط كل يقينها به. حتى دموعها… تجمدت في عينيها، لا تجد طريقًا تنساب فيه.
في الشقة التي خلت إلا من صمت ثقيل… كانت خيبة ضي تبكي وحدها.
…………………………………….
ف احد الكافيهات
حيث يختلط صوت الموسيقى الخافتة بهمهمات الزبائن، دلف عمار بخطوات مسرعة، وعيناه تبحثان في أرجاء المكان بتوتر ظاهر….
وما إن وقعت عيناه عليها، جالسة إلى إحدى الطاولات الجانبية، حتى تسارعت أنفاسه، واتجه نحوها.
اقترب منها وربت على كتفها برفق، وصوته يفيض قلقًا:
آية… في إيه يا حبيبتي؟
فزت كأنها كانت تسبح في دوامة، ثم ما لبثت أن ألقت بنفسها في حضنه، وكأنها وجدت أخيرًا الشاطئ الذي يأويها….
ضمها عمار إلى صدره بقوة، كأنما يحميها من العالم، وهمسة بنشيج مختنق:عمار… وحشتني أوي.
مرر يده على شعرها بحنان، وقبل جبينها بهمسة تحمل كل شوقه: وانتي وحشتيني يا قلبي… كنتي فين؟ وليه تليفونك مقفول اليومين اللي فاتوا؟
تراجعت قليلًا، ومسحت دموعها بظهر كفها المرتجف، وهمسة بصوت مكسور:اقعد… اقعد وانا هاحكيلك.
جلس قبالتها، وقبض على يدها، وكأنما يستمد منها الطمأنينة، وهتف بقلق: قولي يا آية، ف إيه؟ انتي كويسة؟… عمي كويس؟
هزت رأسها نافية، ثم مررت يدها في شعرها المبعثر وأعادته خلف أذنها، قبل أن تهمس بنبرة مخنوقة:
لأ… يا عمار، من آخر مرة شفتك فيها، ولما دخلت … لقيت بابا وماما قاعدين مستنيني، ووشهم كان كله غضب، قعدو يتخانقوا معايا، و… وبيطلبوا مني أقطع علاقتي بيك.
تجمد وجه عمار، وقطب حاجبيه بدهشة مشوبة بمرارة:
عمي؟ عايز كده؟… ده كان فرحان بخطوبتنا… و…
سكت، ثم كأن الحقيقة لدغته في قلبه، تمتم بصوت خافت خال من الحياة:ولا… عشان كل حاجة راحت… مبقتش قد المقام؟
أومأت برأسها، ودموعها تسابق كلماتها:حبسوني… ف أوضتي، ماكنوش بيسيبوني أخرج… غير امبارح بس، لما أوهمتهم إني اقتنعت بكلامهم.
ثم أمسكت بيده بكل ما بقي من رجاء بداخلها، وهتفت بانكسار:عمار… عشان خاطري، ما تسيبنيش أرجع ليهم تاني. يلا نتجوز… أنا مقدرش أعيش من غيرك.
نظر إليها، وكل الحب الذي في قلبه يظهر في عينيه، ثم مسح دموعها بأنامله، وهمس بصوت يتهدج: وأنا بحبك… أوي… ومقدرش أعيش من غيرك. بس دلوقتي… صعب يا حبيبتي. أنا أصلاً قاعد عند سلطان..
وإبراهيم وعلي معايا في شقة واحدة، ومفيش شقة أقدر أجيبها دلوقتي، وكمان… الهم اللي شايله فوق راسي. وانتي… انتي مش هتقدري تتحملي العيشة دي..
هزت رأسها بهستيرية، وصاحت بحرقة:هتحمل… والله هتحمل. دي ضي العيلة اتحملت، أنا مش هتحمل؟!
أغمض عينيه بيأس، وكأن الهم أثقل جفونه، ثم قال بصوت خافت:ضي… غصب عنها، أمر واقع، واتفرض عليها. لكن انتي… دي حياتك، وده اختيارك. وأنا مش عايزك تيجي يوم وتندمي.
اقتربت منه أكثر، ووضعت يدها على وجنته، وبنشيج خافت تمتمت: عمري ما هندم… أنا هندم لو بعدت عنك. صدقني، يا عمار… أنا هموت من غيرك.
ربت على وجنتها برقة، ومسح دموعها بنعومة رجل لا يعرف إلا الحنان معها، ثم قال: خلاص… اهدي، وعايزك تتحملي. إديني فرصة أرجع حقي، وحق إخواتي، وأقف على رجلي…
وإذا كان على عمي، خليه يفتكر إنك بعدتي عني… لحد ما الدنيا تظبط. ووعد… وعد يا قلبي، عمري ما هتخلى عنك.
أومأت برأسها، ودموعها لا تزال تنحدر بصمت، ثم همسة:
بس ما تبعدش أوي… لازم أشوفك.
ابتسم بهدوء، وقال: هشوفك… أنا بمعرفتي.
ردت بصوت خافت: المهم… أشوفك.
…………………………………………..
مساءا في شقه سلطان الهواري
كان المساء قد أرخى سدوله حين دلف سلطان إلى شقته بخطوات متراخية، والملل يرسم تجاعيده على ملامحه. أدار عينيه في أرجاء المكان بحث عن أثر،
وقد توقع أن يجد الشقة خاوية من حضورها، أن تكون قد عادت إلى إخوتها بعد ما دار بينهما… لكنه توقف فجأة، وقد تحول الملل إلى ذهول، والضيق إلى دهشة.
كانت ضي جالسة على الأريكة، منكبة على كتبها، تقلب الصفحات بتركيز واجتهاد يشبه التحدي الصامت. ملامحها توحي بعزيمة لا تشترى، وكأنها تنتقم من شيء ما بدروسها.
اقترب منها ببطء، وجلس إلى جوارها، ثم مد يده ومسح على ظهرها بخفة هامسة : ضي…
لكنها انتفضت كمن لسعت، ودفعته بعنف غاضب، وصاحت محتدة:ابعد إيدك دي… أوعى تلمسني!
اتسعت عيناه في صدمة، وتجمدت كلماته عند حافة حلقه، قبل أن يهمس بصوت ممزق بين الندم والارتباك:
ضي… انتي عارفة إني مكنش قصدي… وأنا ببقى أعمى وقت الغضب…
ومع ذلك، مد يده وقبض على ذراعها، ثم جذبها نحوه بعنف لا يخلو من رجاء، وقال بنبرة حادة تتكسر فيها الغيرة والضعف: بقولك إيه يا بت البدري… لازم تفهمي إنك ليا… ملكي، بتاعتي… بتاعت سلطان الهواري. يعني مش هسمح لجنس ذكر حتى يلمح طرفك، مش يلمسك ويحط إيده عليكي… فاهمة؟
انتزعت ذراعها من قبضته بقسوة، ونظرت إليه بعينين تشتعلان غيظًا، قبل أن تعود إلى مكانها، تبعد جسدها إلى الطرف الآخر من الأريكة، وتسحب كتابها كأنها تحتمي به منه. قلبت الصفحة بعنف، دون أن تنطق بحرف.
جلس سلطان للحظات يحدق فيها، وصدره يعلو ويهبط بصمت يحرق صدره، ثم تمتم بصوت أقرب إلى اللوم لنفسه: انتي اللي غلطتي من الأول…
لكنها لم ترفع عينيها نحوه. ظلت كما هي، صامتة، عازفة عن أي رد.
تنهد بغيظ، ونهض بخطوات مثقلة، كأنما يحمل العالم على كتفيه. دلف إلى غرفة النوم، نزع قميصه بعنف، ثم ألقى بجسده على الفراش كمن يلقي بنفسه في لب الجحيم.
مر الوقت ثقيلاً، كأنه يسير على الجمر. كل دقيقة تمر، تفتت أعصابه ببطء قاتل. وبعد منتصف الليل، نهض من فراشه وهو يغلي، وخرج إلى الصالة.
رآها هناك، غافية فوق كتبها، رأسها يميل على صفحة مفتوحة، وملامحها مرهقة كأنها خاضت معركة… لكنها رغم كل شيء، ما زالت تشبه السلام حين يغفو
اقترب منها، وحملها بين ذراعيه برفق، وكأنها آخر ما تبقى له من الصبر، وهمس بصوت يكاد يبكي الحنين:
تعالي… يا آخرة صبري.
ضمها إلى صدره، وسندها على جانب قلبه، وسار بها إلى غرفة النوم كأنما يحمل أمنية.
وضعها على الفراش بكل رقة، لكنه لم يكمل طقوس الهدوء، إذ فتحت عينيها فجأة، وتجمدت لبرهة، ثم هبت كأنها فرت من كابوس. دفعته بقوة، وسحبت وسادة وشرشف السرير، وخرجت بهما إلى الصالة دون أن تنطق.
وقف سلطان للحظة مذهولًا، قبل أن يرفع حاجبه بغضب مكبوت، ويفجر مرارته بتهكم قاس: تصدقي؟… أنا اللي غلطان… عشان صعبتي عليا… وكنت عايزك تنامي مرتاحة… نسوان! وش فقر.
ثم عاد إلى سريره الذي ما عاد يشبه فراشا، بل فوهة بركان لا ينفك يشتعل في قلبه، ينتظر لحظة الانفجار.
………………………….
في مكان مرتفع يلفه الظلام كأنما ابتلعته الأرض،
وقف خلف يطالع المدينة من بعيد ، والأضواء المتناثرة في الأفق تتلألأ كالنجوم المكسورة…
بدا جسده هناك، لكن عقله كان يسبح في عوالم أبعد من تلك النجوم بكثير… عوالم يختلط فيها الماضي بالحساب، والغدر بالانتقام.
توقفت سيارة سوداء بجانبه، ترجل منها حنفي الرشاش يده ملفوفة بشاش طبي، وعيناه تشعان بغضبٍ دفين. اقترب بخطى مترددة ممزوجة بالانكسار، لكنه حاول أن يخفيها بهالة من الترحيب المصطنع: يا مرحب يا خلف باشا… أنا والله ما مصدق عنيا.
التفت إليه خلف ببطء، وغمغم بابتسامة لا دفء فيها، فقط نفس خبيث يترقرق في نبرته: أهلا يا رشاش…
نظر إلى يده المصابة، وأشار نحوها بسخرية لاذعة:
سلامتك يا رشاش… سلطان الهواري طلع جاحد، وأنت اللي رماك الهوا ونزلت الجمالية.
زفر حنفي بحنق، وغمغم كأنما يتجرع السم: قالوا إنه مسافر… بس كان هناك. ابن الكلب ده خسرني رجالة مربيهم على إيدي سنين! وحرم عليا الجمالية كلها… وانت عارف المنطقة دي يعني إيه… كبيرة وخسارتها أكبر من اللي يتقال.
أومأ خلف ببرود كأن الأمر لا يعنيه، وقال وهو ينظر بعيدًا:وانت عايز مني إيه؟ أجبلك رجالة بدل اللي علم عليهم سلطان؟
هز حنفي رأسه نفيًا، وابتسم بخبث متواطئ:الشوكة اللي وقفت في زوري… هي نفس الشوكة اللي واقفة في زورك… يعني مصلحتي مصلحتك يا باشا.
ضحك خلف ضحكة خافتة كأنها تخرج من بئر ممتلئ بالشر، ثم قال بتهكم ثقيل: أنا قادر على الشوكة دي… أطلعها من زوري وأرميها في أقرب مزبلة… انت اللي عويل.
نفث حنفي دخان سيجارته، وحدق فيه بنظرة تحد مغموسة بالتحريض:أنا عارف… بس انت كمان لا عرفت مكان الورق اللي روحك فيه… ولا قدرت تاخد بت البدري اللي عينك كانت بتاكلها أكل كل ما تشوفها…
في لحظة، تغيرت ملامح خلف..
قبض على ياقة سترته بقوة، واندفعت الكلمات من فمه كحمم الغضب:الورق ده… ما تجيبش سيرته تاني! بدل ما تختفي من الوجود من غير ما نلاقيلك عضم! اللي أرواحهم معلقة في الورق ده… لو حتى في احلامك، مش هتتخيل ممكن يكونوا مين ووصلين فين … خلي لسانك جوا بوك، أحسن ليك… وليا!
صمت لحظة، ثم أردف بصوت خافت كالسم: وبت البدري… هاخدها، وهركعها تحت جزمتي، هي واخواتها… بس بعد ما أشرب من دم سلطان الهواري… لآخر نقطة في جتته.
رفع حنفي يديه كمن يعلن الولاء، وهتف: حقك علي يا باشا… وعداك العيب! خدني في ضهرك… واعتبرني عكاز تتسند عليه… وعمري ما هميل. أنا هبقى سندال في ضهرك.
أومأ خلف برأسه ببطء، عيناه لا تزالان مشتعلتين بشيء أكبر من الغضب، شيء يشبه الهاوية، وقال ببرود قاتل: لما نشوف… خليك جاهز.
