منوعات

نار وهدنه ٥

في الحارة
حيث الحياة تدب في التفاصيل الصغيرة، وحيث يعرف كل وجه نظيره، خرج علي من المنزل يتفحص هاتفه كأنما يحاول الفرار من الواقع عبر شاشة زرقاء. خطواته كانت بطيئة، تائهة، حتى قطعتها نداء جهوري من بعيد:
ــ يا متر!
رفع علي عينيه بدهشة، ليجد عز الهواري يلوح له من داخل المقهى تفوح منه رائحة النعناع والشيشة المختلطة بحكايات الرجال. اقترب منه بحذر، وأجاب: أيوه… حضرتك بتكلمني؟
ابتسم عز وأومأ برأسه بثقة الواثق من دعوته، وقال:
تعال يا متر… نشرب كباية شاي بالنعناع تعدل مزاجك.
تردد علي لحظة، ثم غمغم وهو يخطو خطوة إلى الداخل:
أصل أنا عندي مشوار…
لكن عز قاطعه وهو يلتفت إلى الداخل هاتفًا: يااض يا بريزة! اتنين شاي بالنعناع بسرررعة… المتر مستعجل!
ثم أشار إلى الكرسي المقابل وقال: اقعد يا متر… مش هعطلك، دي خمس دقايق بس.
جلس علي بتوجس، وعينيه تتفحص المكان من حوله كمن لا يزال غريبًا عن هذا العالم. قال بهدوء: اتفضل يا معلم عز… سامعك.
سحب عز نفسًا طويلًا، ثم زفره بهدوء وقال:
سمعت إنك بتدور على شقة للإيجار… مش عاجبك القعدة معانا ولا إيه؟
نظر علي إليه بجدية وأجاب: كنت ناوي أمشي، بس خلاص… أختي اتجوزت أخوك، ومفيش خلاص داعي.. بس هدور على شقة علشان أفتح مكتب محاماة.
أومأ عز بتفهم، ثم مال بجسده للأمام وقال: بس المنطقة هنا ميركبش فيها مكاتب محامين، مش هتشتغل.
إيه رأيك تمسك محل من محلاتنا؟ تديره مع البت نوسة… البت دي خلقها ضيق وبتطفش الزباين بلسانها.
ضحك علي في سره وهو يتذكر تلك الشرسة سليطة اللسان، ثم تمتم: مش عارف بصراحة…
لكن صوته قطع حين دوى صوت عز ينادي جهوريًا:
نوسة!
دلفت نوسة إلى المقهى بخطى واثقة، وعلى وجهها ابتسامة تخطف الأنظار. وقفت أمامهم وهتفت بمرح:
صباح الفل على زينة شباب الصاغة!

نهض عز من مكانه، وطبع قبلة على رأسها قائلًا: صباحك فل يا قلب أخوكي.

نظر علي علي إليها بدهشة، ملامحها لم تكن تشبه الصخب الذي رآها منه من قبل، كانت مشرقة بشكل أربكه، فتمتم بشرود: مين دي…؟

نظر لها عز بدهشة وضحك بصوت مرتفع وقال: يا بت… يعني بعد كل ده الراجل هو اللي غلطان؟!

هزت نوسة رأسها نافية، وقالت بحماس: وحياة غلاوتك عندي… هما اللي بيجروا شكلي الأول.

غمزها عز بعبث وقال: طبعًا… واللي يجر شكل القطة… تخربشه.

لكزته بخفة وضحكت: شوفت؟! أهو قولت بنفسك.

ضحك عز مجددًا، ثم سأل: رايحة فين دلوقتي؟

أومأت برأسها وقالت: قاصدة كريم… يا خويا… هفتح المحل!!

ربت على رأسها بلطف وقال: الله كريم يا قلبي… توكلي على الله.

مضت نوسة في طريقها بخطى واثقة، بينما كان علي يتابعها بعين مندهشة وعقل شارد.

قال عز بعد لحظة صمت: هااا… على الأبيض يا متر؟ استبينها ولا لسه؟

نهض علي وهو يحاول استعادة توازنه، وغمغم بصوت متحشرج: أحم… سيبني أفكر يا معلم عز… يومين كده.

أومأ عز برأسه وقال بنبرة ودودة: تمام… مستنيك، خد وقتك يا متر.

صافحه علي، ثم مضى في طريقه بخطى أبطأ مما جاء، كأن عقله مثقل بشيء جديد.

عاد عز إلى مقعده، وسحب الأرجيلة وهتف بصوت رخيم: غير الحجر يا هاض…

ورد الصوت من الداخل: أوامرك يا هواري.

…………..

مساء في شقة سلطان الهواري

دخل سلطان وهو يحمل بين ذراعيه أكياسًا كثيرة من الطعام والحلوى، كأنه يحاول تعويض كل وجبة فاتتها، أغلق الباب بقدمه وهتف بصوت يحمل لهفة المحب وقلق الرجل: ضي؟… انتي يا بت!

تحرك نحو المطبخ، ألقى الأكياس على الرخام، أخرج تفاحة، قضمها، ثم توجه إلى غرفة النوم… فتح الباب ببطء، ورفع حاجبه بدهشة عندما وجد ضي نائمة على الفراش، جسدها الصغير منكمش، وجهها مرهق، وهدوئها كاذب… كهدوء ما قبل الانفجار.

اقترب منها… جلس على طرف الفراش، تطلع إليها كما يتطلع رجل إلى طفله أنهكها العالم… مد يده برفق تحسس ذراعها، كأنه يتحقق من وجودها وهمس: هي دي المذاكرة؟ يا آخرة صبري.

انحنى قليلًا نحوها، ومال عليها وهمس قرب أذنها: ضي؟… انتي يا بت؟

تململت بجسدها الضعيف، دون أن تفتح عينيها، وبدون شعور، لفت ذراعيها حول عنقه، وتعلقت به… كأنها تستجديه أن يبقي… لا تتركني بعد الآن.

ابتسم بنصف ابتسامة تحمل مزيجًا من الحنان والدهشة، وهمس بحرارة: انتي مستغنية عن نفسك يا بت؟

فتحت عينيها، ناظرة إليه بنظرات باهتة ثم ارتبكت فور أن اصطدمت بالواقع، شهقت بخوف، وابتعدت بسرعة، لكنه لم يترك لها فرصة للهروب، شدها إليه، وهتف بصوت أجش: في إيه؟ صحيتي لقيتي جنبك حد تاني يا بت؟

وضعت يدها المرتجفة على صدره، تحاول استعادة أنفاسها وغمغمت: لا لا… بس مش متعودة لسه…

أسند ظهره إلى ظهر الفراش، ونظر لها بنظرات لاهية تغازلها: اتعودي يا بيضة.

ضحكت بخجل ناعم وهمست: بيضة؟!

مرر كفه على وجنتها، وهمس: آه… أبيض ع الأبيض.

تراجعت قليلًا وجلست جواره، وهمست بدفء: وانت أسمر… بس وسيم.

ابتسم، بعينين تضيئهما السكينة، ثم سألها: إيه أخبار المذاكرة؟

تسلل الحزن بسرعة إلى ملامحها، وأطفأ نور الضحك الذي لم يدم طويلًا، وقالت بصوت مكسور: مش قادرة أذاكر يا سلطان… حاسة دماغي قافلة، مفيش معلومة واحدة راضية تثبت.

صمت لحظة… تأملها، ثم سأل بهدوء: كنتي بتحبي أبوكي أوي انتي يا ضي؟

التقت عيناه بعينيها، فرآها تمتلئان بالدموع، وأجابت: ده سؤال؟ طبعًا… أوي… أوي. بابا كان كل حاجة في حياتي. أنا أصلاً حاسة إن روحي راحت معاه. يمكن عشان كده مش قادرة أعمل حاجة… روحي واقفة في اليوم اللي راح فيه… ولسه واقفة في نفس اللحظة.

سالت الدموع… مع اعتراف متأخر بالحزن، وجرح لم يتوقف عن النزف.

ثم تابعت: عارف… أنا مش فاكرة شكل ماما حتى… مشوفتهاش غير في الصور. عمري ما سمعت صوتها… ولا حضنتها.

رفعت رأسها إليه، بعينين ممتلئتين بالخذلان، وقالت: انت عندك مامتك… وعندك عايدة كمان. مش هتحس يعني إيه تتحرم من أمك… من حضنها. أنا معرفش حضن الأمهات ده عامل إزاي… ولا طعمه إيه.

صمت سلطان، والحزن يمر في عينيه كنهر صامت. كانت كلماتها تخترق قلبه دون مقاومة.

تابعت وهي تمسح دموعها المرتجفة: بس بابا… عوضني. وكان كل حاجة ليا… لحد ما راح، في غمضة عين.

اقترب منها، وقال بصوت لين، يشبه لمسة يد تطمئن طفلًا: انتي تقدري تخرجي نفسك من الكابوس ده، وتحوليه لحلم… حلم تتمسكي بيه بإيدك وسنانك. حتى لو أبوكي مش حواليكي، روحه حواليكي… حاسس بيكي وشايفك، وهيفرح معاكي، ويحزن عليكي.

نظر لها وقال برقة تشبه الوعد: ليه مش عايزة تريحيه؟ لو بتحبيه، لازم تريحيه.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى