
ضحك علي بسخرية حزينة، وغمغم بكلمات تقطر وجعًا:
ويمكن تحرقك يا ضي… وأنا مش هشارك في الجريمة دي.
ثم التفت وغادر بعاصفة من الغضب، وحرائق داخله تلسعه دون رحمة…ركضت ضي وراءه، وشهقت بفزع، وتشبثت ببصيص رجاء وقالت : ألحقه يا عمار! متسبهوش ينزل زعلان!
ضمها عمار بقوة، كمن يلم شتات أخته من الحافة، وهمس: اهدي يا ضي…
وهتف إبراهيم بعزم: أنا رايح وراه!
ثم انصرف في إثر علي، بينما بقي عمار يحتضن ضي المنهارة بين ذراعيه، يربت على ظهرها برفق يغلفه الوجع، وهتف بنبرة ثقيلة: اهدي يا ضي… أنا عارف الأيام دي تقيلة عليكي… بس كله هيعدي. وصدقيني يا حبيبتي، أنا لو مش متأكد إن سلطان هيصونك، عمري ما كنت وافقت على الجوازة دي.
أغمضت عيها، ودفنت وجهها في صدره كمن يهرب من الكون، وهزت رأسها بالإيجاب، وهمسة بنشيج خانق:
عارفة يا عمار… عارفة.
……………………………………
في شقة يسكنها الصمت أكثر مما يسكنها الأُلفة،
كانت جنات تعد المائدة ببطء لم يخل من التوتر. وضعت الأطباق برتابة فوق السفرة، ثم هتفت بصوت عال تحاول أن تغلفه بالدفء: ياسر، الأكل عالسفرة.
خرج ياسر من الغرفة وهو يجفف شعره بمنشفة صغيرة، وابتسامة متعبة ترتسم على ثغره:بت حلال… دانا واقع من الجوع.
جلست أمامه وبدأت تضع له الطعام في صحنه بعناية، ثم قالت بنبرة خافتة أقرب إلى الاعتراف: حسيت يا حبيبي…
أومأ بر头سدون أن يتفوه بكلمة، وبدأ في تناول الطعام بنهم صامت، كأن الجوع فيه أقوى من أي شعور آخر. راقبته جنات بنظرات تائهة، تقلب الطعام في طبقها بشرود حزين، قبل أن تهمس بفتور يحمل خلفه ألف سؤال: أنا هروح بيت بابا بكرة.
رفع رأسه قليلًا، ثم هزها موافقًا دون أن يرفع عينيه عن الطبق، وقال بنبرةٍ عادية: عشان تباركي لسلطان.
ارتسمت الدهشة على ملامحها، وقطبت حاجبها مستنكرة: أبارك لسلطان على إيه؟! هو رجع من السفر أصلاً؟
بلع لقمة، ثم رد بهدوء لا يشبه وقع الخبر: آه… رجع النهارده من شوية… وهيتجوز.
تجمدت يدها فوق المائدة، واتسعت عيناها بذهول مباغت:هــــ إيه؟! هيتجوز؟! إزاي؟! ومين؟! وإمتى؟!
ضحك بخفة متهكمة، وقال وهو يقلب اللقمة في فمه:
عارفة عمار صاحبه اللي كان معاه في الجامعة؟ وكان بييجي معانا كتير هنا من زمان؟
أومأت برأسها ببطء: آه… اللي سلطان دايمًا يقول عليه ابن الأكابر…
أشار إليها بإصبعه: هو… أخته اسمها ضي.
رفعت حاجبها بدهشة متزايدة: هي لحقت توقعه؟! دي لسه جاية البيت من كام يوم!
نظر إليها باستغرابٍ وابتسم بنصف فم: إنتي عارفة أخوكي… وسلطان عمل كده عشان يحميها… يعني لا وقع ولا حاجة.
شهقت بغضب، وضربت الملعقة في الطبق: يعني بعد ده كله يتجوز بالطريقة دي؟!
نظر لها بدهشة، وتمتم بضيق: يعني إيه الطريقة دي؟! أمال انتي عايزاه يتجوز إزاي؟!
عادت تنظر إلى طبقها بشرود، تقلب الطعام بلا رغبة، وهمسة بوجع دفين: كنت عايزاه يتجوز عن حب… يمكن ربنا يهديه… بس يلا، كله محصل بعضه ف الآخر… والحب بيطير.
نظر إليها بامتعاض، وحدق فيها قليلًا وهتف بعصبية:
حد الله! وش نكد… نفسي أشوفك بتضحكي!
ضحكت بتهكم مرير، وقالت: وأنا نفسي أشوفك أصلاً يا ياسر!
قطب حاجبه باستغراب وغمغم :أمال خيالي اللي قدامك ده؟! مانا معاكي أهو!
رفعت وجهها نحوه، وعيناها تتلألآن بدموع محتبسة، وقالت بصوت مخنوق: معايا فين؟! أنا عايزة ياسر ابن عمي… اللي كان مغرقني حب واهتمام… ولا خلاص؟! اتجوزنا، وعدت السنين، والحب مات؟! والاهتمام قلب إهمال وملل وبرود؟!
نهض ياسر من مكانه وقد اشتعل وجهه بالغضب، ومسح فمه بمنديل في حركة حادة، وهتف: أنتي فايقة ورايقة ليه؟! أنا طول النهار في الشغل ودماغي وارمة! مش هيبقى هري في الشغل… وهري في البيت كمان! أنا لما بجى البيت، عايز أرتاح! عايز هدوء! مش حوارات وخالص… ولوكلك فاضي!
رفعت وجهها ونظرت له كأنها تتلقى لطمة جديدة، وهمسة بصوت مختنق: يعني هو ده اللي فهمته من كلامي… يا ياسر؟
هز رأسه بإصرار وصاح : آه… وإحنا في الواقع… وحياتنا عشرة على عشرة يا جنات! متخربيش على نفسك يا بت عمي!
هزت رأسها في استسلامٍ موجع، وهمسة بيأس مشوب بالانكسار: عندك حق… إحنا في الواقع… ويمكن حرام نحلم.
تمتم غاضبًا وهو يدلف إلى غرفته: أنا داخل أتخمد أحسن.
رحل وتركها خلفه، تنظر إلى الفراغ بعينين لا تريان شيئًا، سوى ملامحه التي باتت أبعد من المسافة، وأقسى من الغربة. قلبها يرتجف من خوف لا تسميه، لكنها تعلم أنه الخوف من الفقد… من أن يتلاشى ياسر الذي أحبته، ويترك لها جسدًا يعيش… وقلبا لا يعود.
………………………………….
علي كرنيش النيل
حيث النسيم العليل يتراقص فوق صفحة الماء، وتتمايل أضواء المدينة في حضن النهر، جلس على وإبراهيم علي إحدى المقاعد الخشبية، يحمل هما يتقلب في صدره. وإبراهيم يطالع قسمات وجهه المكفهرة، ثم قال بصوت حنون يشوبه العتاب: انت غلطان يا علي… ناسي إن عمار أخونا الكبير؟ اللي ياما شال مع أبونا الله يرحمه!
نفخ علي من صدره بضيق، ورمى نظرة قلقة للنهر وهو يغمغم: عارف يا إبراهيم… بس برضه! مش عشان أخونا الكبير اللي ربانا، نسكتله وهو بيغلط! ده حتى هيبقى مطمرش فينا ربايته… لازم نحذره.
ضرب إبراهيم كفه على الآخر وقال:مين قالك إنه بيغلط؟! يمكن سلطان هو الراجل الوحيد اللي يقدر على أختك… على دلعها، وطريقة عيشتها اللي اتعودت عليها، وهو يقدر يوفر لها
أشار علي برأسه ورد بصوت حاسم: الجواز مش كده وبس يا إبراهيم… لازم يكون
فيه توافق! سلطان وضي بينهم فرق السما والأرض.
هز إبراهيم رأسه، وقال وهو يحاول تبديد الغيمة في صدر أخيه: والله يا علي مش دايما… متفكرش كتير، سيبها على الله.
تنهد علي، وهم بالرد، لكن صوته انقطع فجأة وهو يسمع صوت يعرفه جيدًا… صوت فتاة تصرخ بغضب مجنون:
يا باااااااااا! اشتري عمرك وابعد عني!
التفت الاثنان في اللحظة ذاتها، ووقعت أعينهما على نوسة، واقفة تزمجر بوجه رجل ضخم الجثة، يبتسم بتبجح وهو يرد: أبيع عمري واشتريك يا غزال الجمالية!
قهقهت نوسة بتهكم ونفضت يدها ثم نهضت فجأة وقالت: انت اللي قولت هتبيع عمرك… وأنا ماليش فيه!
اقترب منها الرجل أكثر، وقال بنظرة وقحة:أبيعه وأبيع أبوه كمان! يا مانجة على فراولة… يا طعم!
اشتعلت عينا علي بغضب، وهب واقفًا بسرعة، ولحق به إبراهيم، الذي هتف متوجسًا:رايح فين يا بني؟ استنى!
لكن الموقف لم يحتج لتدخلهما، لأن نوسة كانت أسرع، وأشرس… قبضت على ياقة قميص الرجل، ثم ضربته بجبهتها على أنفه بقوة، جعلت صوته يعلو وصرخت : يا راجل يا ابن العيبة!
صرخ الرجل من الألم، وارتبك المارة حولهما، بينما إبراهيم انفجر ضاحكًا وهتف :إيه الدماغ دي! دي بت حكاية!
تحلق الناس محاولين فض الاشتباك، وهتف أحدهم وهو يحاول إبعاد نوسة: خلاص يا ست نوسة… الراجل هيفطس في إيدك!
لكن نوسة لم تهدأ، بل زادت وصرخت : هو لسه شاف حاجة! دانا ههينه النهارده… الراجل العرة المقيح المزيت ده!
صاح الرجل يترجى: الحقوووني! حرمت! ورحمة أمي حرمت!
تدخل إبراهيم، وسحب الرجل بصعوبة، بينما وقف علي أمام نوسة يحاول تهدئتها: خلاص يا آنسة، سبيه… وبلاش شوشره ف الشارع، أنتي بنت برضو ومينفعش كده!
رفعت نوسة حاجبها، ونظرت إليه بشهقة غاضبة: جرى إيه يا جدع انت؟ اتكلم زي الناس… وانت إيه اللي حشرك أساسا؟!
قال علي بدهشة:أنا خايف عليكي! أنتي بنت… وليكي سمعتك وسط الناس!
لكزته بخفة على صدره، وهتفت: سمعتي أنضف من أجدعها بت ف الحارة والمنطقة يا عيني… واللي بييجي على سكتي بفلقه نصين!
قطب علي حاجبيه بدهشة، وقال: انتي بنت، مش راجل، عشان تتكلمي كده!
ضحكت بنزق، وقالت: تصدق؟ كنت لسه هقولك نفس البؤ ده! إنت ليه بتتكلم كده؟ استرجل يا با!
قبض على يدها بهدوء، وقال: هو أنا عشان بتكلم بهدوء وباحترام… أبقى مش راجل؟ هي الرجولة دلوقتي بالصوت العالي والجعير؟!
تألمت من قبضته على يدها، وسحبت يدها بعنف، وقالت:
طيب سيب يا جدع! انت… إزاي تمسكني كده؟!
تركها علي بهدوء، بينما كان إبراهيم قد تخلص من الرجل الذي قال بأنفاس متقطعة:تسلم يا كبير!
ثم ركض مبتعدًا، وصاح بصوت خائف: يخرب بيت أم البنات اللي زيك يا شيخة!
هتفت نوسة وهي تشير إليه: اهرب يا مره! بس لو شفتك تاني على سكتي… هلبسك طرحيتي!
ثم نظرت لعلي وإبراهيم بنزق، وهتفت: عالم ما تختشيش!
ثم استدارت، وانصرفت بخطوات واسعة غاضبة. أما علي، فظل متسمرا في مكانه، وعيناه تتبعانها في ذهول، حتى ضرب إبراهيم كفًّا على كف وقال: يا لهوي… يلا يا ابني نروح!
هز علي رأسه، وانصرف معه، بينما لا يزال في أذنه صدى صوت نوسة، وفي قلبه سؤال لم يفهمه بعد… هل كانت تلك الفتاة… تشبهه؟!
…………………………………………
في اليوم التالي
وجلست على الأرض، كأنها سقطت من فوق عمرها.
انكمشت على نفسها، وبكت… بكت كل شيء في حياتها التي انقلب رأسا على عقب…
كأن الزمن ضاق عليها، وتركها تصارع الخوف وحدها.
مر وقت طويل
حتي دلفت حياة إلى الغرفة تترنح تحت وطأة أكياس كثيرة، وهي تهتف بصوت متأفف: ضي، خدي عني يا بت، هقع على وشي!
مسحت ضي دموعها ونهضت بسرعة، قطبت حاجبيها ، ومدت يدها تلتقط بعض الأكياس وهتفت بدهشة:
إيه ده؟! انتي نزلتي عملتي شوبنج لوحدك؟
ضحكت حياة بخفة، وضعت الأكياس جانبًا وقالت:
لا يا ستي، دي حاجات بعتها سلطان مخصوص ليكي… فستان وشوية حاجات كده عشان كتب الكتاب.
عقدت ضي ذراعيها بصدرها، وملأ وجهها الامتعاض وصاحت: يعني إيه؟! مش هختار فستاني؟ هو اللي يختارلي ألبس إيه دي ايه الدكتاتوري دي ؟!




