
اقتربت منها حياة بشفقة وربتت على كتفها، وهمسة:
اهدي يا حبيبتي، هو يمكن بس عمل كده علشان كتب كتابكم النهارده، ومفيش وقت. وبعدين بصراحة، سلطان ذوقه حلو، إن شاء الله يعجبك.
أخرجت ضي الفستان من الكيس، كان بلون الأوف وايت، أنيق وناعم في تفاصيله، منسدل بخفة، مزخرف بورود ناعمة على الأكمام، محتشم، مغلق من الصدر وينسدل باتساع بسيط.
لكنها عقدت حاجبيها وقالت ببرود: مش حلو… عادي جدًا ومقفل… بيخنق.
دخلت عايدة في تلك اللحظة، وعلى وجهها ابتسامة متوترة وقالت : يلا يا ضي، الناس بدأت تيجي، وانتي لسه ما لبستيش!
أجابت ضي بصوت خافت متحشرج بالدموع: الفستان مش عاجبني يا طنط…
أمسكت عايدة بالفستان، تفحصته بإعجاب وقالت:
ليه بس يا حبيبتي؟! ده حلو أوي وشيك كمان!
رمقت ضي الفستان بنظرة خاطفة، وأشاحت بوجهها وغمغمت بدموع : حاسه إني هتخنق منه… مقفول أوي.
رفعت عايدة يدها بحنو وربتت على كتفها وقالت : طب جربيه يا بنتي… يمكن يفرق عليكي لما تلبسيه.
أومأت ضي بضيق، وأخذت الفستان ودلفت إلى المرحاض لحظات، وخرجت ترتديه. بدا الفستان وكأنه خلق ليزينها، لكنه لم يلامس قلبها، همسة وهي تحدق بالأرض : اهو… مش عارفه… مش عاجبني… حاسه إني مخنوقة…
وما إن فتحت عايدة فمها لترد، حتى جاء صوته العميق من خلفها، يحمل ظلاً من التهكم والغضب: خانقك المقفول يا بت البدري؟
شهقت ضي وصرخت: آه! مش استايلي، وأنا مش بحب الخنقة دي!
اقتربت عايدة بسرعة تضغط على ذراع ضي وهتفت :
ده زي القمر عليكي يا حبيبتي، وبعدين الستر قيمه، يا بنتي.
اقترب سلطان، بخطواته الثقيلة، وهتف بصرامة:
سبينا يا عايدة.
تشبثت ضي بذراع عايدة كطفلة تخشى الغرق وهمسة بنحيب : لالا، طنط، خليكي معايا… متسبنيش لوحدي!
ربتت عايدة على يدها بحنو وهمسة: متخافيش، يا ضي…
ثم خرجت هي وحياة وأغلقتا الباب خلفهما.
لم تمضي لحظات حتى قبض سلطان على ذراع ضي بعنف وسحبها إليه، صوته منخفض لكن نبرته تحمل قسوة العالم: بقولك إيه… من أولها كده، أنا مبحبش اللت والعجن… كلمه وتقطمي أحسنلك. واللي أقوله يتنفذ، وتنسي اللبس العريان اللي كنتي بتلبسيه. أنا متجوزك لوحدي، مش شراكة من الخلق.
ارتجفت ضي، ووضعت يدها على صدره لتدفعه وغمغمت بدموع: اااف بقا دراعي! حرام عليك… إنت بتخوفني ليه؟ مش هتبطل الهمجية دي؟
هز رأسه ببرود، وعيناه تشتعلان بجنون هادئ:
لا مش هبطل. أنا كده ومش هتغير… وعاجبني كده. وانتي هيعجبك، برضاكي أو غصب عنك… انتي فاهمة؟
همسة ضي، وعيناها تلمعان بقهر دفين:خلاص… سيبني… بليز، إيدي بتوجعني أوي…
شدها إليه أكثر، وهمس بصوت أجش أمام شفتيها المرتجفتين: هو ده اللي أنا عايزه… ولسه يا بت البدري… أنا هربيكي من أول وجديد.
ثم تركها فجأة، كما لو ألقاها من قمة جبل.
سقطت ضي على الأريكة، وخرج من الغرفه واغلق الباب بعنف… مسحت دموعها وهي تدلك ذراعها بتنهيدة موجوعة، وهمسة بصوت مكسور: همجي… متوحش… أعمل إيه بس يا ربي؟!
مر الوقت سريعًا، وتبدلت الأجواء.
كانت ضي تجلس وسط النساء والأطفال، الموسيقى تدوي حولها، الأيادي ترتفع بالزغاريد، والأجساد تتمايل رقصًا.
لكنها… كانت كأنها في فراغ، تنظر حولها بدهشة باردة، وكأن الكون من حولها يدور وهي وحدها ساكنة، لا تملك القوة للحراك، ولا القلب للفرح.
كل ما تسمعه صار بعيدًا… كأن الأغاني تأتيها من كهف سحيق، وصوتها الداخلي يصرخ في صمت: هو ده الجواز؟ هو ده المصير؟!
لكنها ابتلعت دمعتها… علها لا تنفضح…
………………………………..
في الحارة،
اشتعلت الأرض بالخطى الراقصة، كأن الرجال يضربون الأرض طربًا، تهتز أجسادهم على أنغام الأغاني الشعبية، تملأ الضحكات السماء، وتتراقص الزغاريد بين الشرفات.
كان الفرح في الحارة كالعيد الكبير، الزينة تتدلى من الشرفات، وأضواء ملونة ترقص على وجوه الناس، والدبائح تعلق على الأبواب كأعلام نصر وكرم. امتلأت الشوارع برائحة اللحم المشوي، واختلط دخان الطهي بدخان البخور، فصار للفرح رائحة لا تنسى.
الأطفال يركضون، والنساء يزغردن من الشرفات، والرجال يضحكون من القلب. لم يبق بيت إلا ووصله نصيب من اللحم، ولم يمر وجه إلا وارتسمت عليه بسمة رضا.
كانت الدعوات لسلطان تخرج من القلوب وليس من الشفاه.
لم يكن عرس سلطان مجرد زفاف…
كان ليلة محبة، تتويجًا لرجل معطاء، فحصد دعاء الناس قبل تهانيهم.
جاء المأذون، يحمل بين يديه عقدًا سيغير مصيرًا.
جلس بثبات، وحوله اجتمع الرجال، حتى تقدم سلطان وجلس إلى جوار عمار، يتشابك كفاهما في مصافحة الرجولة والمحبة، وعلى وجهيهما مسحة من الجد والهيبة.
بدأ المأذون في التلاوة: زوجتك موكلتي ضي عثمان البدري…
وصوت سلطان وعمار يردد خلفه بثقة ورخامة، كأنما يوقعان على ميثاق شرف لا مجرد عقد.
حتى إذا ما ختم المأذون بدعائه: بارك الله لهما، وبارك عليهما، وجمع بينهما في خير..
انفجرت الزغاريد عالية، واختلطت بأصوات إطلاق النار، كأنما السماء تصفق معهم.
احتشد الرجال حول سلطان، يهنئونه، يصافحونه، يربتون على كتفيه، كأنه ابنهم العائد من الحرب ظافرًا لا عريس.
ضمه عمار بقوة وهتف بصدق: ألف مبروك يا صاحبي… ضي أمانة في رقبتك!!
ربت سلطان على ظهره وأجابه بنبرة حاسمة: ورقبة سلطان الهواري سدادة يا صاحبي.
اقترب إبراهيم، صافحه بحرارة ثم جذبه إلى صدره بحضن رجولي صادق، وهمس بجدية: مبروك يا سلطان… ربنا يتمم لك على خير… خلي بالك من ضي.
أومأ سلطان برأسه بوقار، ورد بصوت خافت: في عيني يا هيما… في عيني.
في الأعلى، عند شرفة الشقة، وقف علي يتأمل المشهد، عيناه تغليان بالسخط، كأنه يشاهد العبث بعينه لا الفرح.
زم شفتيه بغيظ، ثم دلف إلى الداخل وأغلق الشرفة خلفه بعنف، كأنه يحبس الحقد بداخله.
وفي الأسفل، كان عز يشعل الجو، يطلق الرصاص عشوائيًا في السماء، يهتف بضحكة عالية: مبروك يا شقو! أخيرًا دخلت القفص يا راجل!
اقترب منه سلطان وضحك بعلو صوته، ثم جذبه لحضن رجولي عنيف وهتف: أنت ليه شكلك كده فرحان فيا أوي!
ضحك عز وربت على ظهره: أوي يا جنرال… بس فرحان ليك أكتر، تستاهل الفرحة دي والله.
ثم جاء ياسر، ضمه هو الآخر وقال بمزاح: أنا اللي فرحان فيك يا جنرال… أهلاً بيك في عالم النكد والعكننة!
قهقه سلطان، وهتف بخبث: لا مش مع سلطان، دي هتنسى العكننة، وهتروق معايا!
ثم جاء راجح، حاول أن يرفعه كما جرت العادة مع العرسان، لكن ما إن أمسكه حتى قال وهو يلهث: إيه يا جدع، بتاكل زلط؟! كده مش هنقدر نرفعك زي أي عريس!
انفجر الجمع بالضحك، حتى كادت الزغاريد تتوارى خجلًا من صوتهم.
صفق سلطان على كتفيهما بنزق مصطنع وهتف: ترفع مين؟ أنا أرفع، بس ما ترفعش!
واشتعل المكان بالضحك والتهاني، كأن الفرح انفجر من الأرض، لا من السماء.
اقترب علام بوقار وهتف: مبروك يا سلطان ربنا يتمملك بخير ضي أمانتك أمانة عثمان البدري.
أومأ سلطان برأسه وقال: الله يبارك فيك يا مستشار تسلم يا كبير.
ابتسم علام بهدوء وقال: ممكن أشوف ضي عشان أباركلها؟
أشار له سلطان وغمغم بصوت أجش: اتفضل يا مستشار.
في الداخل،
انفجرت الزغاريد من حناجر النساء، تتطاير بين جدران البيت كطيور فرح لا تعرف التعب، تملأ المكان دفئًا وبهجة.
الأنوار تتراقص على الجدران، والقلوب تخفق، بين من تعبر عنها عيناها، ومن تخفيها خلف ابتسامة مرتعشة.
اقتربت بطة، بعفويتها وطيبتها التي تشبه أمهات الحارة، وضمت ضي بقلبٍ لا يعرف الكره، وهمست بفرحة صادقة: مبروك يا مرات ابني…
لم تستطع ضي إلا أن تهمس، ودموعها تتكسر في مقلتيها: ميرسي يا طنط…
ثم علت زغرودة من جنات، شقت قلب ضي أكثر مما فرحته، واقتربت منها وضمتها بحب، ثم قالت: مبروك يا ضي… ربنا يتمم لكم على خير يا قلبي.
هزت ضي رأسها بصمت، شفتاه تتحركان ببطء، تحاول ابتلاع لعابها بصعوبة…
الألم في معدتها يتلوى، كأنه شظايا من نار.
الغثيان يضغط على حلقها، والدوران يسحب الأرض من تحت قدميها، لكنها تحاول الثبات… تحاول ألا تنهار الآن.
اقتربت منها عايدة، بعينين فيهما قلق الأم وخوفها، وضمتها بحنان صادق ثم سألتها بلطف: مالك يا ضي؟ انتي تعبانة؟ وشك أصفر يا حبيبتي.
هزت ضي رأسها بخفة، وهمست بصوت متعب: آه… معدتي بتوجعني أوي…
نظرت لها عايدة بشفقة، وقالت بنبرة حنونة: ليه يا بنتي؟!
أجابت ضي بصوت مبحوح، يشبه أنينًا محبوسًا: مش عارفة… عندي غثيان ودوخة… وألم في معدتي مش طبيعي.
ربتت عايدة على شعرها بحنان كأم تمسح عن طفلتها وجع الدنيا، وقالت: هعملك كوباية نعناع تروقك يا حبيبتي… ومتخفش فكي كده !!
وقبل أن تنهض، كانت حياة قد جاءت، بعفويتها وضحكتها العالية، أمسكت بكف ضي وهتفت بحماس: قومي نرقص يا ضي! يلا بينا، الناس كلها بره!
لكن ضي انسحبت برفق، وهزت رأسها وهمست: لأ… معرفش… اسكتي يا حياة، أنا تعبانة.
ولم تكد الكلمات تخرج حتى دوى المكان بدخول الرجال.
سلطان، وعلام، عمار، عز، وإبراهيم… حضورهم مثل رعد مفاجئ، تهادى بينهم سلطان بخطى الواثق.
اقترب منها، وفي صمت مهيب، انحنى وقبل رأسها، ثم غمغم بصوت خفيض: مبروك يا عروسة…
أغمضت ضي عينيها، كأن رائحته قد اخترقتها بلا إذن.
رائحة رجولية صريحة، ممزوجة بعطر نافذ، ونفحات دخانية من تبغ ثقيل، لكن هذا الخليط لم يكن مزعجًا…
بل دخل قلبها كالسهم، ترك أثرًا… طبع رائحته فيها، كأنها لن تنساها أبدًا.
جاء عمار، ضمها وقبل رأسها هو الآخر، وقال بلهفة: مبروك يا ضي… عين أبوكي.
هزت رأسها بصمت وهي لا تستطيع تحريك لسانها…
اقترب علام وضم ضي التي تعلقت به وكأنها تستنشق فيه أنفاس والدها، وغمغم علام وهو يربت على شعرها بحنان أبوي: مبروك يا بنتي!!
أومأت برأسها وهمست بوهن: الله يبارك فيك يا أونكل..
تنهد علام بيأس وقال: مش عايزك تشيلي هم كلنا في ضهرك وأولنا جوزك !!
وكأنه يرسخ بداخل عقلها أنها أصبحت زوجته وأصبح زوجها ولا مجال للرجوع…
ثم تقدم إبراهيم فجأة، رفعها عن الأرض، ودار بها وسط الجمع بصخب طفولي صاخب: مبروك يا ضي البدري!
شهقت ضي، وضعت يدها على صدره، وهمست وهي تلهث: إبراهيم… نزلني… دايخة…
قبل أن يتركها، كان سلطان قد جذبه من ذراعه بحسم، وأنزلها برفق ثم قال: هيما… كده هنخسر بعض يا صاحبي… دي ضي السلطان خلاص.
ضحك عز وضرب كفه بكف سلطان وهو يهتف: مبروك يا ضي!
أومأت برأسها وهمست بخجل متعب: ميرسي…
اقترب منها سلطان، أمسك يدها برفق وقال:
يلا بينا يا ضي كفاية كده..
ارتجف جسدها تحت يده الخشنة، التي تحوي دفء الأرض، وصرامة وخشونة نادرة.
وتجمدت مكانها، كأن قدميها انغرستا في الأرض.
سأل عمار وهو يراقب المشهد: لسه بدري يا شقو؟
رفع سلطان حاجبه ببرود، وتمتم: هي مش مراتي دلوقتي؟
تردد عمار وقال: أيوه… بس…
ضحك سلطان، وبصوت لا يخلو من السحرية قال: ليه الشغل الضيق ده يا شقو؟ خليك حلو… يا ابن الأكابر.
هز عمار رأسه بلا رد، بينما سحب سلطان ضي بهدوء…
خرج بها من الصالة وسط عيون النساء، وفتح باب المصعد، ودفعها إلى الداخل بلين، وأغلق الباب خلفهما.
داخل المصعد، كانت ضي تلتصق بالحائط، تتنفس بصعوبة.
هو يقف إلى جوارها، يشعر باهتزاز جسدها، يتنفس رائحتها…
رائحة تشبه الفراولة الطازجة… ناعمة، رقيقة، منعشة، لكنها مثله تمامًا… تترك أثرًا لا يمحى.
مرت لحظات ثقيلة، حتى وصل المصعد إلى الطابق الرابع، وفتح الباب…
وفي صدرها، كانت أنفاسها الأخيرة قبل أن تدخل عالمًا لا يشبه أي شيء آخر.
مد سلطان يده نحو ضي، وقبض على كفها المرتجف، ثم قادها بصمت عبر الردهة حتى وصلا إلى باب الشقة. فتحه ودلف للداخل، ثم التفت ونظر إليها بحدة ممزوجة بملامح رجل أنهكته الليلة بطولها.
قال بصوته الخفيض الخشن: ادخلي يلا.
ترددت على العتبة، وعيناها تتفحصان أرجاء المكان برهبة متأججة….
كل شيء حولها بدا غريبًا، جديدًا، كبيرًا عليها، وكأنها اقتلعت من عالمها الصغير البسيط وزُرعت فجأة في عالم آخر لا تشبهه ولا يشبهها.
تلعثمت والدموع معلقة بطرف رمشيها وهمست: إنت جيبني هنا ليه؟ أنا… أنا عايزة أدخل شقتنا.
لم يلتفت لها، فقط تابع خطواته داخل الشقة، وبدأ يفك أزرار قميصه واحدًا تلو الآخر، بصبر نافد وحركة آلية.
قال بضجر: ادخلي يا بت، أنا مش ناقص لعب عيال.
اتسعت عيناها بذهول، وتراجع قلبها في صدرها كما لو أنه سقط من مرتفع.. ركضت نظراتها على صدره العاري، وازدادت ضربات قلبها حدة، كأن ألم معدتها اشتعل ألف مرة، والغثيان ارتفع حتى حلقها….
تراجعت خطوة، ثم هزت رأسها بعنف وهمست بصوت منكسر: لا لا… إيه يا نهار أسود… البس بسرعة يا وقح!
توقف سلطان في مكانه، ونظر إليها بدهشة غير مصدق، ثم اقترب منها بخطوات بطيئة، لكن مهيبة كأنها خطوات الخطر نفسه وقال: هو الجنان اشتغل؟ تعالي يا بت هنا!
ركضت نحو الدرج، ضامة فستانها بيديها كمن يهرب من الموت ذاته. أما هو، فركض خلفها بسرعة خاطفة، وقبل أن تهرب أكثر، قبض على ذراعها وسحبها نحوه، ثم رفعها على منكبه كما لو كانت ريشة، وهو يهتف ساخرًا: إحنا هنقضيها شقلبة وفرهده من أولها؟!
ضربته بقبضتها الصغيرة، تائهة بين الغضب والخوف، وصرخت: لا لا والنبي! يا عمار الحقني!
ضحك ضحكة قصيرة ساخرة، ثم دخل بها الشقة وأغلق الباب خلفه بعنف. ألقى بها برفق على أقرب أريكة، ونظر في عينيها بنفاذ صبر وهو يهتف: إنتي وعمار في ليلتك الطويلة دي! بقولك إيه، الجنان ده مايكلش معايا بدل ما تهب مني… وأنا مش عايز كده.
تراجعت عنه برعب، وهي تطوي ساقيها تحتها كطفلة تبحث عن الأمان… وهمست بنحيب مرتعش وهي تضع يدها على فمها تحاول تكتم شهقتها: حاضر… حاضر أهو.
جلس بجانبها، وربت على ساقها وقال بلهجته الساخرة:
اهدتي يا ضي… هو إنتي عندك قناة السويس في عينك؟! مش قناة دمعية زينا!
هزت رأسها بنفي خافت، وغمغمت: إنت بتخوفني.
رفع ساقه اليسرى على الأريكة، وانحنى قليلًا نحوها، صوته يملأ الفراغ المربك بينهما وقال: وأنا عملت إيه يخوفك دلوقتي؟ مش قلنا ما بحبش المحن؟
ابتلعت لعابها بصعوبة، وضغطت كفها على صدرها، وهمست: البس… بجد شكلك مرعب!
ضحك بخفة واقترب منها، نظر في عينيها طويلًا ثم قال:
أنا بحب أقعد كده في شقتي… براحتي.
رمشت بعينها المرتبكة وأشاحت وجهها وهمست: لما تكون لوحدك…
أمال شفتيه في ابتسامة مائلة وهمس: ما أنا لوحدي… أنا وأنت واحد خلاص.
نظر إلى يدها الموضوعة على صدرها، ووضع كفه فوقها، يضغط برفق وسأل: هو إيه الحوار؟ في إيه هنا؟
شهقت بحدة وسحبت يده، وغمغمت: لا… شيل إيدك… أنا معدتي بتوجعني أوي.
اقترب منها حتى اختلطت أنفاسهما، وسأل بلين غير معتاد منه: طب ليه؟ في دوا بتاخديه؟ ولا مكلتيش؟ ولا إيه الحوار؟
وضعت يدها على صدره لتبعده، وصوتها خرج مبحوحًا:
لا… أنا لما بخاف وأتوتر… معدتي بتوجعني.
ضحك بعبث، وهمس بصوت أقرب للهمس: لا لا… الكلام ده مايكلش… عايزك جامدة كده. إحنا لسه قدامنا مشاوير… لو ما جمعتيش قلبك هتروحي فيها.
عقدت حاجبيها بدهشة وغمغمت: مشاوير؟ يعني إيه؟
غمز لها وقال بمكر: مش مهم… قومي دلوقتي حضري عشا، أنا جعان…
فتحت فمها بدهشة لم تكملها، فمرر إصبعه على شفتيها، واستنشق رائحة أحمر الشفاه وهمس: فراولة…
حاولت النهوض، وقالت بخجل: يعني إيه؟
ضحك وغمغم: خفيتي أهو… يلا على المطبخ.
تحركت ببطء، ما زالت تنظر في كل زاوية من الشقة الفخمة المنظمة، كأنها في حلم لم تفق منه بعد. دخلت المطبخ العصري الأنيق، حيث كل شيء يلمع بترتيب غريب عليها.
دارت حول نفسها، متوترة، خائفة، يفتك بها الغثيان. أخيرًا جلست في النهاية على طاولة المطبخ، تمسح دموعها بكف يدها المرتجف… لم تعد قادرة على فهم نفسها… أو ما يحدث حولها.
مرت لحظات طويلة قبل أن يخرج سلطان من غرفته، وشعره المبلل ينقط على صدره العاري. ارتدى بنطالًا منزليًا وخرج واتجه إلى المطبخ.
هااا… خلصتي الأكل…
توقف فجأة وحدق إلى المطبخ وقطب حاجبيه بغضب وتجمد في أرضه وووو
يتبع
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




