
ساري بهدوء وعيناه تنظران إليها بتمعن:
— تقدري تقولي اللي يخليكي مديونه ليا عمرك كله.
زمت شفتيها في ضيق قبل أن تهرب من نظراته وهي تتناول شطيرة الطعام بيدها.
عادت لمصر وحدها بعدما اطمأن لاقلاع الطائرة بها، بينما سافر هو إلى بلدته.
جلس خلف مكتبه الفخم واضعًا قدمه فوق المكتب ينفث دخان سيجارته الغالية في هدوء مراقبًا دخانها يتطاير أمامه.
اقترب منه فهد صديقه حاملًا فنجان قهوته قائلًا له:
— فهد: ياه، كل ده تفكير.. أول مرة أشوفك بالحال ده يا ساري.. كل ده عشان البنت دي؟
ساري بهدوء:
— اللي غايظني إنها ولا كأنها موصومة.. وقحة وبترد بجرأة، لأ وقاحة، وكأنها ند ليا.
فهد مفكرًا:
— يمكن من وجهة نظرها عادي.. يعني انت عارف في ناس عايشين بالفكر الأمريكي اللي هو عادي إني أعيش مع واحد من غير جواز.. وعادي إني أخلف وأربي ابن لوحدي حتى لو مش ابن شرعي.. الفكر العلماني المتحرر اللي سيطر على عقول بعض المثقفين في مجتمعاتنا العربية، بتوع حرية الإنسان والهبل ده.
ساري:
— مش عارفه.. شكلها ميديش ده.. يعني لبسها محتشم.. وبتاعة شغل بس.. جايز.
فهد:
— طيب كبر دماغك منها.. هو انت ناقص نسوان؟ دول تحت رجليك بالعبيط.
ساري بشغف:
— لا.. دي غيرهم.. عاوزها ولو لليلة، لا ليلة مش كفاية.. عاوزها لحد لما ألاقيها مكسورة أودامي.. أشوفها بتعيط وتبوس إيدي عشان بس أحن عليها.
ضحك فهد قائلًا:
— بس خلي بالك، لأحسن تقع في حبها يا خفيف.
ساري ساخرًا:
— انت مجنون.. دي حشرة، آخد منها غرضي وأرميها زي غيرها.
فهد:
— ورهف زوجتك؟ وضعها فين من كل ده؟
ساري بضيق:
— موجودة ومش موجودة… ولا يفرق معاها اللي زي رهف دي، أهلها فهموها إن الراجل ما دام بيلف ويرجع لبيته مش مهم أي حاجة تانية.
فهد:
— يعني بتحبكش؟
ساري:
— ولا أنا عمري حبيتها. طول عمري كانت بنت عمي، ودلوقتي أم العيال وشريكتي اللي مسكاني من رقبتي.
فهد ضاحكًا:
— انت عارف انت إيه مشكلتك؟ إنك عمرك ما حبيت بجد. يمكن لو كنت حبيت من قلبك مكنتش تبقى بتخبط بالشكل ده وانت في الأربعين.
ضحك ساري قائلًا:
— أحب؟!! انت مجنون. حب إيه اللي بتتكلم عنه؟ انت قلتها بنفسك محبتش قبل كده. هجي وانا في قمة نضجي ووضعي ده وأحب وأضيع هيبتي ومكانتي عشان واحدة بس، وأنا قادر أجمع حواليا جيش من الستات بفلوسي؟
فهد:
— بفلوسك؟!! بس مش عشان شخصك. هو ده الفرق بين الحب وبين المتعة. واحدة هتحبك وتعشق تراب رجليك من غير مقابل، وواحدة هتبقى عبدة ليك مقابل قرشين.
زم ساري شفتيه قبل أن ينهض قائلًا لصديقه:
— طيب يا حكيم عصرك، يلا تعالى نتغدى عشان جعت.
الفصل الخامس
عاد للقاهرة بعد غياب شهر تقريبًا.
راقب حضورها من خلال زجاج مكتبه المطل على صالة التحرير. كانت جميلة، لا يستطيع أن ينكر هذا حتى مع إنكارها هي نفسها لجمالها بتلك التسريحة الغبية التي تلملم بها شعرها الأسود بإهمال فوق رأسها، وتلك النظارات الطبية الحمقاء التي ترتديها، وملابسها الطفولية والتي تقتصر على الجينز والبلوزات البسيطة. تخيلها وهو يراقبها ترتشف كوبًا أمامها، بفستان سهرة يظهر مفاتنها. نفث دخان سيجارته الكوبي أمامه وابتسم في خبث لمجرد تخيله لها.
ضغط على زر سكرتيرته ريم قائلًا لها:
— ساري: ابعتيلي الأستاذة رئيسة قسم صفحة المرأة حالًا.
تراجع بعض الخطوات للخلف. سمع طرقًا على الباب، أجاب بالدخول.
دخلت إليه، كانت هادئة على عكس عادتها منذ عرفها. اقترب منها قائلًا لها:
— ساري: مفيش حمد لله على السلامة؟ استنيتك تيجي تسلمي زي باقي زمايلك، على الأقل عشان تشكريني على إني أنقذت حياتك.
تضايقت لكلماته وهي تنظر إليه بعينان غاضبتان قبل أن تسيطر على غضبها قائلة بهدوء:
— صافي: متشكرة جدًا، وحمد لله على السلامة. أي أوامر تانية؟
استدارت لتنصرف إلا أنه أمسك بيدها فانتفضت وتلخبطت، وظهر الغضب أكثر على وجهها قائلة بعصبية:
— صافي: لو سمحت، مش معنى إن إنقذتني إن ده يديك الحق إنك تتخطى حدودك معايا. أنا كنت في مهمة تبع شغلي، يعني إنقاذك ليا واجب عليك أو على الجريدة، لأني في النهاية محسوبة عليكم باعتباري موظفة عندكم.
قاطعها قائلًا:
— انتي عارفة أنا دفعت كام؟
أجابته بهدوء:
— لو حابب تخصمه من مرتبي…
قاطعها مرة أخرى قائلًا وهو يتقدم ناحيتها أكثر قائلًا:
— ساري: أنا مستعد أدفع لك قد اللي دفعته، ولو إن كده البيعة تبقى خسرانة أوي معايا.
نظرت إليه بعدم فهم قائلة:
— بيعة إيه؟ مش فاهمة حاجة.
تفحص جسدها بوقاحة قبل أن يقول:
— إنك تبقى ليا.. ملكي يعني. في العادة بحدد الوقت، أد إيه بس معاكي هسيبها مفتوحة، يعني عقد مفتوح المدة.
عقدت حاجبيها في ضيق قائلة:
— انت سامع نفسك بتقول إيه؟ يعني مستوعب انت بتعرض عليا إيه؟
ساري:
— بعرض عليكي الجواز.
صافي:
— جواز عرفي؟!! ده انت لو عرضت عليا جواز رسمي أودام الناس والله هرفضك.. انت فاكر نفسك إيه؟ دون جوان عصرك؟ انت بالنسبة لي مش أكتر من راجل تافه معاه قرشين وفرحان بطوله وعرضه، وبشوية الستات التافهة اللي بتجري وراه. ولعلمك، انت من غير فلوسك دي ولا تسوى حاجة.
قالتها وخرجت من أمامه تاركة إياه واقفًا مكانه متوعدًا إياها بإذلالها عما قريب.
في الأيام القليلة التي تلت آخر مواجهة مباشرة لهم سويًا، تلاشت صافي من أي مكان قد يجمعهما سويًا، وإن كانت نظراته النارية إليها كلما مر بصالة التحرير أثناء دخوله أو خروجه، أو حتى أثناء جولاته بين أروقة المكاتب.
ذات يوم دخل طارق طليقها إلى صالة التحرير، استقبله عبد الحميد وأوصله بنفسه إلى مكتب ساري.
جلسا ثلاثتهم في المكتب يحتسون القهوة، ثم تحدثا حول عقد الإعلانات الجديد.
ظل ساري طوال الجلسة يتفحص طارق وهو ينفث دخان سيجارته بهدوء. كان شابًا في منتصف الثلاثين على ما يبدو من هيئته، وسيم رغم لونه القمحي، عريض الكتفين يبدو أنه رياضي مواظب من عضلات صدره والتي تبرز تحت قميص بدلته الفاخرة.
وضع طارق بعض الشروط من أجل تجديد العقد، خاصة في صفحات المرأة، والتي طالب فيها أن تهتم أكثر بعرض أزياء مجموعة شركته الجديدة للفاشون.
ظل ساري صامتًا يستمع إليه وإلى عبد الحميد، والذي ناقشه بهدوء في استحالة وضع مثل هذه المواد في صفحة المرأة التي تديرها صافي، نظرًا لكونها صفحة تحقيقات أكثر منها صفحة ترفيهية تهتم بالموضة وخلافه.
وقتها طلب طارق أن يبعثوا للمختص بإدارة الصفحة ليتواجد بينهم من أجل مناقشة الأمر معه.
فهم ساري ما يدور برأس طارق، إلا أنه وافقه وطلب من ريم أن تبعث بصافي إليهم، ربما أراد أن يرى رد فعلها حين ترى طليقها الذي رمى اليمين عليها ليلة زفافها واتهمها بتهمة بشعة تمس أخلاقها.
دقائق ودخلت صافي.. زمت شفتيها في ضيق فور رؤية طارق، إلا أنها تماسكت وجلست قبالته في هدوء ورزانة كما لو أنه شخص غريب لم تعرفه من قبل.




