منوعات

انكسار الطاووس حكايات شروق خالد

سليم وقف في نص المكتب، نفسه حامي وسريع. المحامي شوقي بص له وقدم له كوباية مية: “تشرب حاجة يا سليم بيه؟”

سليم زق الكوباية بإيده بعنف: “مش زفت! أوجدلي حل يا شوقي! التصرف ده فيه كيد وفيه سوء نية! أنا ممكن أرفع عليها قضية إضرار بالمال العام أو إضرار بالشركة!”

شوقي هز راسه بنفي قاطع: “تؤ… متورطش نفسك أكتر من كده. المدام متنازلة مش بايعة، وتنازلها مكتوب فيه بالنص إنها ‘تهب حصتها للشركة دون مقابل للرفع من كفاءتها المالية’.. القانون ميعاقبش حد بيتبرع بفلوسه. هي قفلت عليك كل سبل التقاضي. نورهان هانم معاها مستشارين قانونيين يوزنوا بلد.”

سليم خرج من مكتب المحامي وهو حاسس إن الشارع كله بيبص له. ركب عربيته، وساق بغل وهو مش عارف هو رايح فين. دماغه عمالة تعيد المشهد بتاع إمبارح بالليل… وقفتها قدامه.. طريقة حطها للدبلة جنب كاسه… النظرة اللي في عينها اللي مكنش فيها ولا نقطة كره، لكن كان فيها كمية “استغناء” تذل أي راجل.

المطر كان بيتزايد، وسليم مسك الموبايل وطلب رقم نورهان للمرة العشرين. المرة دي… التليفون مجمعش “غير متاح”.

المرة دي التليفون رن!

قلب سليم دق بسرعة وبقوة في صدره. رن… ورن… ورن… وفجأة، السكة فتحت. سليم أخد نفسه بسرعة وقال بصوت متلخبط بين الغضب والعصبية: “نورهان! انتِ فين؟! إيه الجنان والمهزلة اللي انتِ عملتيها دي؟! انتِ فاكرة إنك بالطريقة دي بــ—”

صوت هادي ورزين قاطعه.. بس مكنش صوت نورهان. كان صوت راجل كبير في السن، نبرته تقيلة ومتربية، وصارمة زي السيف: “اهدأ يا سليم يا بني… متتعبش صوتك.”

سليم فرمل بالعربية على جنب الشارع وفجأة جسمه قشعر: “مين معايا؟”

الصوت رد ببرود: “أنا الحاج إسماعيل… والد نورهان. ونورهان مش هترد عليك تاني خلاص. الورق اللي بينكم هيخلصه المحاميين. وأظن الرسالة وصلت لك كاملة ومش ناقصة ولا حرف.”

سليم اتوتر، الحاج إسماعيل ده راجل من كبار أعيان الصعيد، وراجل مبيظهرش كتير في الأضواء لكن كلمته مسموعة في البلد كلها، وسليم طول عمره بيعمله ألف حساب.

“عمي إسماعيل…” سليم حاول يلطف صوته: “اللي حصل إمبارح كان سوء فهم، وأنا ونورهان ممكن نقعد ونـ—”

الحاج إسماعيل قاطعه بضحكة واطية تقيلة: “سوء فهم؟ لما تفضح بنتي قدام ميتين وتلاتة وأربعين واحد وتلغي قيمتها وتكسر بخاطرها، وتقول ‘استمرار جوازنا مبقاش يفيد حد فينا’.. ده تسميه سوء فهم؟”

سليم بلع ريقه وصمته خانه. كمل الحاج إسماعيل بصوت زي الحديد: “بنتي استحملتك حداشر سنة يا سليم. شالت بيتك وشركتك واسم عيلتك اللي كان هيقع من سنين لولا فلوسنا وتعبها. وكانت ساكتة ومغطية عليك ومكبرة بيك قدام يسار ويمين. وانت افتكرت إن ده ضعف… افتكرت إنها مالهاش ظهر.”

“عمي، أنا—”

“انت تسمع بس!” الحاج إسماعيل زعق بصوت هز السماعة: “نورهان رجعت بيتها… رجعت لمكانها ولأهلها اللي يعرفوا قيمتها. والفلوس والأسهم اللي سابتهالك في الشركة دي مش جدعنة منك… دي ثمن الحداشر سنة اللي ضيعتهم من عمرها معاك. اعتبرها دفعت ثمن حريتها كاش!”

سليم إيده كانت بتترعش على الطارة: “عمي، خليني أكلمها بس دقيقة واحدة…”

“نورهان مش فاضيالك يا سليم”، الحاج إسماعيل قالها بنبرة فيها تشفي هادي: “نورهان حاليًا مسافرة دبي عشان تمسك إدارة الفرع الجديد لشركات العيلة هناك… حياتها الجديدة بدأت خلاص، وانت بقيت مجرد صفحة مطوية في كتاب قديم. خلي فريدة بقى تنفعك وتدفعلك الـ ١٥٠ مليون بتوع البنك.”

السكة اتقفلت في وش سليم. سليم مسك التليفون وفضل باصص للشاشة بذهول. الهدوء اللي جوه العربية كان قاتل. لأول مرة في حياته، سليم المنسي يحس إنه عريان.. صغير… ومفهوش أي ميزة من غير الست اللي كان فاكر إنه بيمتلكها.

الموبايل رن في إيده تاني. بص على الشاشة… كانت فريدة. سليم بص للاسم بقرف، وعقله افتكر كلامها: “انت تستاهل حد يكون فعلًا عايز العيشة والحياة اللي انت بنيتها.” أتاري الحياة دي كلها مكنتش من بناؤه أصلًا.. كانت من بناء نورهان.

سليم كنسل على فريدة، وعمل لها بلوك. وداس بنزين ومشي بالعربية في شوارع القاهرة وهو مش عارف هيعمل إيه في مصيبة البنك، ولا إزاي هيفهم الناس إن “المنسي” من غير “نورهان”… مجرد اسم على ورق!

 

4 من 4التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى