
“سليم حبيبي! صباح الخير. أنا سمعت باللي حصل إمبارح في الحفلة.. بجد برافو عليك، أخيرًا أخدت الخطوة وشلت الست دي من حياتك! يلا بينا بقى نتقابل عشان نخطط للصحافة ونعلن عن علاقتنا بـ—”
سليم قاطعها بصوت حاد وزي الفحيح: “فريدة… اقفلي دلوقتي. مش فاضيلك.”
“إيه؟ سليم انت بتكلمني كده ليه؟”
“بقولك اقفلي!”
قفل السكة في وشها ورمى التليفون على المكتب.
افتكر كلام صاحبه توفيق إمبارح: “دي شكلها ست مش ناوية تعتب هنا تاني خالص.”
توفيق مكنش يقصد إنها مش هترجع القصر بس… توفيق كان فاهم إن نورهان لما مشيت، سحبت معاه العمود الفقري لكل حاجة سليم كان فاكر إنه بيمتلكها.
سليم سحب مفاتيح عربيته ونزل بسرعة.
ركب العربية وطار بيها على مكتب المحامي بتاعه. طول الطريق، المطر كان لسه بينزل، وصوت مساحات العربية كان بيعمل نغمة منتظمة في ودنه… نغمة بتفكره بضربات المعلقة على الكاس إمبارح بالليل.
أول ما دخل مكتب المحامي، المحامي قام وقف ووشه مش مبشر بالخير خالص.
“سليم بيه… كنت لسه هكلمك.”
“إيه اللي بيحصل يا أستاذ شوقي؟ نورهان عملت إيه؟”
المحامي حط ملف أسود قدامه على الترابيزة وقال بهدوء: “مدام نورهان معملتش أي حاجة غير قانونية يا سليم بيه. هي ببساطة رفعت إيدها. والصبح بدري، المحامي بتاعها سلمنا إخطار رسمي… بإنها تنازلت عن جميع أسهمها في شركة المنسي للعقارات.”
سليم اتنفس بسرعة: “كويس! يبقى الشركة بقت خالص ليا!”
المحامي بص له بأسف وقال: “مش بالبساطة دي يا سليم بيه… المدام كانت مالكة لـ 51% من الأسهم الضامنة للقروض البنكية للشركة. لما تنازلت عن الأسهم، البنك فعل بند المخاطر.. والحسابات الجارية للشركة اتجمدت من الساعة 8 الصبح لحد ما تقدم ضامن جديد بنفس القيمة المالية.”
سليم قعد على الكرسي بذهول، وحس إن الأرض بتتسحب من تحت رجليه.
“يعني إيه؟”
المحامي كمل بصوت واطي: “يعني حضرتك حاليًا… مفلس إجرائيًا لحد ما تلاقي تمويل بـ 150 مليون جنيه قبل نهاية الأسبوع.”
سليم غمض عينه. افتكر شكله وهو واقف إمبارح قدام الـ 243 ضيف، وهو رافع كاسه بكل غرور وبيقول: “أنا ونورهان وصلنا لمرحلة إن استمرار جوازنا مبقاش يفيد حد فينا.”
دلوقتي بس، فهم الكلمة اللي قالتها وهي ماشية وبتبتسم ابتسامتها الهادية: “أتمنى الحياة اللي اخترتها تكون كل اللي انت فاكر إنها هتكونه.”
#حكايات_شروق_خالد
سليم قعد في مكتب المحامي، سكت شوية، والدم هرب من وشه.
“أستاذ شوقي… انت بتقول إيه؟ ١٥٠ مليون جنيه في أسبوع؟ انت متأكد من الأرقام دي؟”
المحامي هز راسه بأسف وضغط على القلم اللي في إيده: “يا سليم بيه، مدام نورهان مكنتش مجرد زوجة للمظهر والوجاهة، المدام هي اللي كانت السيولة الثابتة للكيان ده كله. الأسهم اللي كانت باسمها هي اللي البنك واخدها ضمان للائتمان. لما هي تنازلت، البنك أخد حذره فورًا وجمد كل حاجة.”
سليم مسك دماغه بإيديه الاتنين. أفكاره كانت بتجري زي الخيل. كيف؟ إزاي ست بتتحرك في الهدوء ده؟
ولا عيطت، ولا صرخت، ولا خبطت في الكلام، ولا عملت شوية شو قدام الناس… هي بس قلعت الدبلة ومشت، والشركة كلها اتزلزلت من تحتيه في أقل من أربع وعشرين ساعة!
موبايله رن تاني. المرة دي مكنش ده كان رقم أستاذ توفيق، صاحبه الأنتيم. سليم رد بسرعة وسوّاء بصوته عشان ماينكشفش: “أيوة يا توفيق…”
صوت توفيق جه رزين وتقيل من الناحية التانية: “سليم… انت فين؟”
“أنا في مشوار كده مع المحامي، خير في حاجة؟”
توفيق سكت ثواني، وبعدين قال بنبرة فيها حسرة: “الخبر اتسرّب للبورصة يا سليم. أسهم ‘المنسي للعقارات’ نازلة من أول ما الجلسة فتحت. والمستثمرين الكبار بيسألوا عن نورهان… السوق كله عارف إن نورهان هي اللي كانت شايلة الشغل التقيل والملاءة المالية.”
سليم قام وقف من طوله، وعروق رقبته نطت: “سوق إيه ونيل إيه! الشركة باسم عيلتي أنا! اسم المنسي هو اللي ليه قيمة في السوق مش هي!”
توفيق ضحك ضحكة مكتومة وبسيطة، ضحكة راجل خبرة شايف طفل بيعاند: “يا سليم يا حبيبي… الاسم هيبة، بس الفلوس هي اللي بتشيل. انت عشت حداشر سنة فاكر إنك الطاووس اللي ممشي المزرعة، ومكنتش شايف إن نورهان هي اللي بنيالك القفص والحماية. البورصة مابتفهمش في الهيبة، البورصة بتفهم في الأرقام. ونورهان سحبت أرقامها.”
سليم بلع ريقه بصعوبة: “توفيق… انت ممكن تتدخل؟ تقرضني المبلغ ده للبنك بس أسبوعين لحد ما أظبط أموري؟”
توفيق رد بهدوء قاتل: “أنا بحبك يا سليم، وانت صاحبي. بس أنا بيزنس مان… ومش هدخل فلوسي في سفينة قبطانها خرقها بكتفه عشان يثبت إنه قوي. لو عايز نصيحتي؟ انزل من على الحصان العالي اللي انت راكبه ده، وروح دور على نورهان.”
“أدور عليها؟!” سليم صرخ في التليفون: “بعد اللي عملته ده؟!”
“هي معملتش حاجة يا سليم”، توفيق قالها بنبرة حسم: “هي سابتهالك خالص زي ما انت طلبت قدام ميتين وتلاتة وأربعين واحد. انت اللي أعلنت استغنائك… هي بس نفذت طلبك بالحرف.”
توفيق قفل السكة.




