قصص وروايات

نقطة تحول بقلم فاطمة عيد2

ماجد : احنا الاتنين غلطنا وفقدنا السيطره واللى حصل خلاص مش هيتغير .. ملوش لازمه النقاش ف حاجه زى دى .. وانا اسف ع غلطى

غاده بدموع بتحاول تداريها : روحنى

( يحرك العربيه وهى طول الطريق بتعيط وتمسح دموعها قبل ما يشوفها لكن هو خد باله من ضيقتها .. يوصلوا قدام البيت وقبل ما تنزل )

ماجد : انتى واخده اجازه لحد الفرح .. قدامك تلت اسابيع يدوب تجهزى فيهم

غاده : اوك

ماجد : انا اسف

غاده : مش هيغير حاجه

ماجد : ع الاقل تعرفى انه غلط غير مقصود

غاده : ان شاء الله

( تنزل غاده وهو متابعها بعينه لحد ما تختفى وتدخل البيت اول ما تدخل يضرب ع الدركسيون بعصبيه )

ماجد بعصبيه : غبي غبااااى .. ايه اللى عملته داااا

( يحرك العربيه بنرفزه ويمشي .. تمر الايام من غير اى جديد غاده مش بتروح الشركه ومشغوله ف شرى اللبس وتجهيزات الفرح وماجد بيروحها ع فترات لانه بيغير اوضته باكملها ديكور واثاث فبيقف بنفسه مع العمال ومحدش فيهم حاول يكلم التانى طول الفتره دى .. ماجد راحلهم مرتين وكانت بتبقي مع مقابله على كل جمعه لكن غاده كانت بتتهرب منه ومش بتحاول تتكلم معاه حست انها ضعيفه اوى قدامه وتجاهلته تماما .. عدوا التلت اسابيع وكل واحد ف وادى لوحده محدش فيهم فتح الموضوع او اتكلم مع التانى .. يوم الفرح .. الفرح هيتعمل ف الفيله .. توصل غاده واهلها الصبح عشان يجهزوا ف البيت .. ماجد جابلها الميكب ارتست ف البيت .. تستقبلهم نبيله )

نبيله : اهلا

نعمات بابتسامه : ازيك يا حبيبتى عامله ايه وايه احوالك نبيله بجفاء : كويسه .. فين العروسه !

فرح : اهى

( تبصلها نبيله تلاقيها فعلا جميله وكمان لبسها ع الموضه .. بس برضو مش متقبله نسبهم )

نبيله بتكبر : مش بطاله

فرح : هو ايه اللى مش بطاله .. هو انتى بتعاينى بضاعه

( تشدها نرجس وتحط ايدها ع بقها )

نرجس بابتسامه : اومال استاذ ماجد فين ؟

نبيله : واقف بره مع العمال

نرجس : اه تمام

نبيله : اوك

( تقعد نبيله وتحط رجل ع رجل وتقرأ مجله )

نعمات بتوشوش نيفين : ياختى هى مالها شايفه نفسها علينا كده ليه ؟!

نيفين : مش عارفه .. سيبك منها

نعمات : سيبانى ياختى بس مبقتش مرتاحه ع اختك كده

نيفين : ماجد معاها متقلقيش

( يقاطعهم دخول ماجد )

ماجد بابتسامه : مساء الخير

نعمات بفرحه : مساء النور يا حبيبي .. مبروك يابنى تتهنوا وتتسعدوا يارب

ماجد : الله يبارك فيكى يا امى

( تأفف نبيله وتقفل المجله )

نبيله بزعيق : فوززززيه .. فوززززيه

( تيجى فوزيه بتجرى )

فوزيه : ايوه يا هانم

نبيله بنرفزه : هاتيلى قهوتى فوق عشان ضغطى على والمكان هنا يخنق

( تبصلهم من فوق لتحت وتتنهد بنرفزه وتطلع )

نعمات باستغراب : هى امك مش موافقه ع الجوازه ولا ايه ؟

ماجد : لا ابدا هى بس تعبانه شويه

فرح : ماهى بتمشي اهى اومال مجتش الخطوبه ليه !

ماجد : بتدوخ لما بتخرج بره البيت .. المهم الميكب ارتست مستنياكو فوق .. اول دور الاوضه اللى ف الوش

نرجس : اوكى

( تاخدهم ويطلعوا كلهم يجهزوا .. يعدى الوقت .. يجى الليل يروح ماجد يجيب غاده من الاوضه وكالعاده جميله فوق الطبيعى .. ينزلوا ويقفوا ف الممر اللى ف الجنينه وقدامهم الناس تحت عمالين يصقفوا ويبصولهم وهو مبتسم وهى سرحانه )

ماجد : ع الاقل افردى وشك شويه قدام الناس

( تبصله وتستغرب نفسها هى بتعمل ايه هنا .. ازاى هيبقي جوزها بعد دقايق ازاى ! .. يتنزلوا يقعدوا ع التربيزه عليها المأذون وجابر ومصطفى وقاعد هو وأكرم وتامر والشهود ونبيله وشيرى بيتابعوا من بعيد بخنقه ومش مبسوطين من اللى بيحصل .. غاده كل دا سرحانه وبتفكر ف اللى جاى وحاسه انها عاوزه تهرب بس خلاص فات الاوان .. عينها بتبص ع كل الموجودين واتثبتت ع ماجد .. وحاسه انها بترتكب غلطه حياتها .. تفوق من سرحانها ع صوت المأذون )

المأذون : بارك الله لكما وبارك عليكما وجمع بينكما ف الخير

( الزغاريط عليت ف البيت والدى جى اشتغل وهى وماجد بصوا لبعض نظره طويله قاطعهم محمود اللى حضن ماجد )

محمود : مبروووك يا ميجز

( عينه ع غاده وبيحضنه )

ماجد : الله يبارك فيك

( يباركولهم كلهم ويبدأوا الرقصه السلو .. نرجس واقفه بتابعهم يقرب عليها محمود )

محمود : مبروك فك الجبس

نرجس بابتسامه : مرسيي

محمود باحراج وتردد : شكلك حلو انهارده

نرجس بغرور مصطنع : انا ع طول حلوه

( يضحكو ويفضلوا يتكلمو .. مصطفى كان بيجيب عصير من البوفيه وهو معدى شيرى تكون رايحه ع البوفيه تخبط فيه والعصير يدلق عليها )

شيرى بعصبيه مكتومه : اوووه شت .. مش تاخد بالك يا بنى ادم انت

مصطفى : انتى اللى خابطه فيا ع فكره

شيرى بغيظ : وانا اللى اتبهدلت

مصطفى : شويه اريل وتبقي زى الفل

شيرى : اريل !!! اووووه نو ابعد ابعد مش ناقصه

( بتصرخ فوشه يبصلها باستغراب ويضحك عليها ويمشي وهو مش مبطل ضحك وهى اتعصبت اكتر .. يعدى الوقت ويخلص الفرح .. تاخد نعمات والبنات غاده وتطلعها الاوضه وماجد واقف تحت مع الناس لحد ما يمشوا كلهم .. يدخلوا الاوضه وينبهروا بيها )

نعمات : بسم الله ما شاء الله .. الاوضه جميله

نيفين : تجنن يا امى تجنن

فرح : ذوقه راقى اوى جوزك دا

نرجس : اكيد يا بنتى مش خريج فنون .. يلا يا جماعه وصلنا خلينا نمشي بقي

نعمات : طب اخرجوا انتو عاوزه غاده ف كلمتين

نيفين بضحك : طب ما تخلينى انا ع وش جواز برضو

نعمات بتطلعهم بره : يلا يابت لما يجى وقتها بقي

( يخرجوا البنات وهى تقعد مع غاده )

نعمات : جميله يا حبيبتى تبارك الله

غاده : ميرسيي يا ماما

نعمات : بصي يا غاده ماجد كويس ولو طلبتى عنيه هيجبهالك ولا بخيل ولا متعب وطبعه هادى وذوق كده .. انا عرفاكى لسانك متبرى منك وناقصه تربيه .. احترمى جوزك واسمعى كلامه يقولك اعملى سوى من غير تفكير تقوليله حاضر .. فاهمه ولا لا

غاده : اها فاهمه

نعمات : وتحترمى اهله وتبقي كويسه معاهم ومتقليش ادبك ع حد

غاده : حاضر

نعمات : وتهتمى باكله ولبسه وشغله ودلعيه

غاده : حاضر -_-

نعمات : و…

تقاطعها غاده : حاضر يا ماما حاضر .. فاهمه كل دا اتكلى بقي

نعمات بضحك : شوف البت عاوزه تمشينى ازاى .. انا ماشيه ياختى ربنا يهنيكى يا حبيبتى

( تحضنها وتنزلهم وغاده قاعده تفكر المفروض تعمل ايه .. تنزل نعمات يكون الناس كلهم مشيوا )

جابر : بنتى امانه ف رقباتك تحطها جوه عنيك

ماجد : متقلقش يا عمى

مصطفى بجديه مصطنعه : متزعلهاش اشطا عشان سلامتك بس

( تخبطه نعمات ويضحك ماجد )

ماجد : مش هزعلها حاضر

جابر : طب نستأذن احنا بقي

ماجد : تحب ابعتلكو السواق يوصلكوا

جابر : لا مصطفى هيروحنا بعربيته

ماجد : تمام توصلوا بالسلامه

( يمشوا كلهم ومصطفى وراهم وهو خارج يلمح شيرى .. يقرب عليها )

مصطفى بضحك : لو الاريل مساعدتكش حطى فانيش

( يضحك ويمشي وراهم وهى تتعصب اكتر وتطلع اوضتها وهى متنرفزه منه .. يطلع ماجد اوضته ويخبط خبطتتين ويدخل .. اول ما يدخل يتصدم من اللى قدامه …

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى